काठमाडौं । नेपाल मजदुर किसान पार्टीका सांसद प्रेम सुवाल, भक्तपुर नगरपालिकाका प्रमुख सुनिल प्रजापति, पार्टी जिल्ला अध्यक्ष न्हुछेभक्त फोजू, नगर कृषि समितिका संयोजक एवम् वडा नं. ३ का वडाध्यक्ष राजकृष्ण गोरा, प्रमुख प्रशासकीय अधिकृत रामलाल श्रेष्ठको टोलीले शुक्रबार साल्ट ट्रेडिङ कर्पोरेसन लिमिटेड र कृषि सामग्री कम्पनी लिमिटेडको कार्यालय काठमाडौंमा पुगेर किसानलाई समयमै रासायनिक मल उपलब्ध गराउन आग्रह ग¥यो ।
सांसद सुवालले रोपाइँको बेला पनि किसानहरूलाई समयमा मल उपलब्ध नभएको र अहिले गहु छर्ने तथा आलु रोप्ने बेलामा पनि मलको हाहाकार भएकोले दुवै संस्थाको ध्यानाकर्षण गराउनुभयो ।
पञ्चायतकालमा मात्र होइन बहुदल र गणतन्त्रमा समेत स्थिति उस्तै हुनुबाट सरकार र सम्बन्धित निकाय जिम्मेवार नदेखिएको उल्लेख गर्दै उहा“ले सरकारले १२ अर्ब रूपैयांको मल समयमै खरिद नगरेको हुँदा देशको कृषि उत्पादनमा खर्बौं रूपैयाँको नोक्सान भएको तर्फ सम्बन्धित अधिकारीहरूको ध्यानाकर्षण गराउनुभयो ।
उहाँले भक्तपुरमा यस वर्ष गहुँ खेती बढ्ने र सोहीबमोजिम मल आपूर्ति बढाउनुपर्नेमा जोड दिनुभयो ।
भक्तपुर नगरपालिकाका प्रमुख प्रजापतिले मलको ठेक्का प्राप्त गरी आपूर्ति नगरेकाहरूलाई पाँच करोड रूपैयाँ जरिवाना नपुग्ने भएकोले त्यसबाट भएको नोक्सानीको क्षतिपूर्ति भराउनुपर्ने आवश्यकता औंल्याउनुभयो ।
साल्ट ट्रेडिङ कर्पोरेसन लि.का प्रमुख कार्यकारी अधिकृत उर्मिला श्रेष्ठले नेपाललाई आवश्यक रसायनिक मलमध्ये ३० प्रतिशत मल साल्ट ट्रेडिङ कर्पोरेसन लिमिटेडबाट आठ वर्षदेखि आपूर्ति भइरहेको उल्लेख गर्दै तीन महिनाअगाडिको निर्देशिकाअनुसार मंसिर महिनादेखि स्थानीय तहको उपमेयर वा उपाध्यक्षको संयोजकत्वमा गठित समितिबाट सिफारिस भएका सहकारीलाई मल बिक्रीको डिलर प्रमाणपत्र दिने र मल उपलब्ध गराउने बताउनुभयो ।
कृषि सामग्री कम्पनी लिमिटेडका प्रबन्धक सञ्चालक नेत्रबहादुर भण्डारीले ठेकेदारले मल नल्याउँदा मलको हाहाकार भएको र अबको एघार दिनभित्र पर्याप्त मल आपूर्ति हुने बताउनुभयो ।
उहाँले मल नल्याएका पाँच ठेकेदारलाई पाँच करोड रूपैयाँको दरमा जरिवाना गरेको बताउनुभयो ।
कृषि विकास मन्त्रालयले जिल्लागत मलको कोटा तोकेको बताएपछि सांसद सुवालले कोटाअनुसार मल पठाएर बाँकी यही गोदाममा राख्नु उचित नभएको हुँदा कोटा सच्याइ बढाएर पठाउनुपर्ने औँल्याउनुभयो ।
साल्ट ट्रेडिङका वरिष्ठ अधिकारी पंकज जोशी र कृषि सामग्री कम्पनीका बिक्री प्रमुख राजेन्द्रबहादुर कार्कीले पनि मल आपूर्ति गर्न तदारूकतासाथ लागिपर्ने बताउनुभयो ।
