भक्तपुर, मंसिर १५
कतारमा जारी फिफा विश्वकप फुटबल प्रतियोगिता २०२२ मा हारबाट शुरुवात गरेको अर्जेन्टिना अन्ततः समूह विजेताको रुपमा दोस्रो चरणमा प्रवेश गरेको छ । विश्वकपको समूह सी को समूह चरणको अन्तिम खेलमा पोल्याण्डलाई पराजित गर्दै अर्जेन्टिना दोस्रो चरण अर्थात नकआउट चरणमा प्रवेश गरेको हो ।
स्टेडिय ९७४ रंगशालामा बुधबार राती सम्पन्न खेलमा अर्जेन्टिनाले पोल्याण्डलाई २–० ले पराजित गरेको हो । अर्जेन्टिनाको जितमा एलेक्सिस म्याक एलिस्टर र जुलियन अल्भारेजले एक एक गोल गरे ।
प्रतियोगितामा रही रहन जित आवश्यक भएको खेलमा अर्जेन्टिनाका कप्तान लियोनल मेस्सीले पेनाल्टीमा गोल गर्न चुके । खेलको ३९ औं मिनेटमा अल्भारेजले दिएको क्रस बचाउने प्रयासमा पोल्याण्डका सेचेज्नीको हातले मेस्सीको अनुहारमा लाग्यो । खेल रेफ्रीले भिडियो असिस्टेन्ट रेफ्रीको सहायता लिँदै अर्जेन्टिनालाई पेनाल्टी दिए ।
तर मेस्सीले उक्त पेनाल्टीमा गोल गर्न सकेनन् । सेचेज्नीले आफ्नो बायाँतर्फ डाइभ दिँदै मेस्सीको पेनाल्टी प्रहार विफल पारे । जारी विश्वकपमा उनको यो दोस्रो पेनाल्टी बचाउ हो । यसअघि उनले साउदी अरेबियाका अल दसारीको पेनाल्टी पनि बचाएका थिए ।
पहिलो हाप गोलरहित बराबरीमा सकिएको खेलको दोस्रो हापको शुरुमै अर्नेन्टिना अग्रता लिन सफल भयो । खेलको ४६ औं मिनेटमा एलिस्टरले गोल गर्दै अर्जेन्टिनालाई अग्रता दिलाए । नाहुएल मोलिनाले दायाँ विंगबाट दिएको लो क्रसलाई एलेक्सिसले गरेको प्रहार फितलो थियो । तर उक्त प्रहार दुई डिफेन्डर र गोलरक्षक पार हुँदै गोलमा परिणत भएको थियो ।
अर्जेन्टिनाले खेलको ६७ औं मिनेटमा अग्रता दोब्बर पारे । अर्जेन्टिनाका लागि दोस्रो गोल अल्भारेजले गरे । एन्जो फर्नान्डेजले पेनाल्टी क्षेत्र बाहिरबाट दिएको पासलाई अल्भारेजले पेनाल्टी क्षेत्रभित्र डिफेन्डरको दबाबमाझ नियन्त्रण गरे । उनले त्यसपछि गरेको प्रहार गोलरक्षक सेचेज्नीको हातमा लाग्दै गोल भएको थियो ।
जितसँगै अर्जेन्टिना दुई जित र एक हारसहित ६ अंकका साथ समूह विजेताको रुपमा दोस्रो चरणमा प्रवेश गर्यो । पोल्याण्ड हारका बावजुद समूह उपविजेताको रुपमा दोस्रो चरणमा प्रवेश गरेको छ ।
समूहको अर्को खेलमा मेक्सिकाले साउदी अरेबियालाई २–१ ले पराजित गरेपनि पोल्याण्ड गोल अन्तरको फाइदा उठाउँदैं दोस्रो चरण प्रवेश गरेको हो ।
समूहमा पोल्याण्ड र मेक्सिको दुवैको एक जित, एक हार र एक बराबरीका साथ ४ अंक रहेको छ । तर मेक्सिको गोल अन्तर माइनस एक भएका कारण पोल्याण्ड दोस्रो चरण प्रवेश गरेको हो । एक समय पहेंलो कार्डमा समूहको दोस्रो र तेस्रो स्थानको छिनोफानो गर्ने अवस्था रहेको थियो । तर इन्ज्युरी समयको अन्त्यतिर मेक्सिकोले गोल खाएपछि पोल्यान्ड त्यहि गोलको सहायताले गोलअन्तरमा अघि रहँदै नकआउट चरणमा स्थान बनाउन सफल रहयो । यदि मेक्सिकोले अन्तिम समय गोल थपेको भए पोल्यान्ड बाहिरिने थियो । साउदी अरेबिया ३ अंकसहित पुछारमा रहयो ।
लुसेल रंगशालामा मेक्सिकोलाई जित दिलाउन हेनरी मार्टिन र लुईस चाभेजले गोल गरे । मार्टिनले खेलको ४७ र चाभेजले ५२ औं मिनेटमा गोल गरेका थिए । कर्नरमा सेजार मोन्टेसको फ्लिकलाई मार्टिनले ६ यार्ड बक्स नजिकबाट गोलमा परिणत गरे । त्यस्तै चाभेजले फ्रिकिकमा दर्शनीय गोल गर्दै मेक्सिकोलाई जिततर्फ उन्मुख गराए । उनले झन्डै ३० यार्ड टाढा प्राप्त फ्रिकिकलाई टप कर्नरमा गोल गरेका थिए ।
खेलको इन्ज्युरी समयमा साउदीले गोल फर्काउँदै खेलमा फर्कने संकेत गरेका थिए । साउदीका सलिम अल्दावसरीले गोल फर्काउँदैं आफुलाई खेलमा फर्काउने प्रयास गरेपनि त्यो सम्भव भएन, अन्ततः मेक्सिको २–१ ले विजयी भयो । तर साउदीका सलिमको त्यही गोल मेक्सिकोलाई घर फर्काउन काफी रह्यो ।
