भक्तपुर, असार ४
भक्तपुर चेम्बर अफ कमर्स र व्यापार तथा निकासी प्रवद्र्धन केन्द्रको संयुक्त आयोजनामा भक्तपुरका उद्योगी व्यवसायीहरुलाई अन्तराष्ट्रिय बजार पहुँच सम्बन्धी चार दिने तालिम प्रदान गरिएको छ । आयात निर्यात व्यापारमा सहजिकरण गर्दै अन्तर्राष्ट्रिय बजारसम्म नेपाली उत्पादनहरुको पहँुच बढाउन सहयोग पु¥याउने उद्देश्यले तालिमको आयोजना भएको हो ।
गत जेठ ३१ गते शुरु भएको उक्त तालिम शुक्रवार सम्पन्न भएको हो । तालिमका सहभागीहरुलाई प्रमाण पत्र वितरण गर्दै भक्तपुर चेम्बर अफ कमर्सका अध्यक्ष न्हुछेरत्न मानन्धरले जिल्लाका उद्यमी व्यवसायीहरुको क्षमता अभिवृद्धिका लागि तालिम फलदायी हुने बताउनुभयो । सरोकारवाला निकायहरुको साथ सहयोग प्राप्त भएको खण्डमा जिल्लाका मौलिक उत्पादनहरुलाई अन्तर्राष्ट्रिय बजारसम्म पहुँच पुर्याउन सहज हुने उहाँले अपेक्षा गर्नुभयो ।
व्यापार तथा निकासी प्रवद्र्धन केन्द्रका उपनिर्देशक एवं तालिमका प्रतिक्षक राजेन्द्र सिंले दुढ इच्छा शक्तिले नै अवसरको ढोका खोल्ने बताउँदैं केन्द्रले व्यवसायीलाई अवसरतर्फ दोहोर्याउने कार्य गर्दै आइरहेको जानकारी दिनुभयो ।
तालिममा सहभागी पशुपति भुसालले चार दिने तालिममा सहभागी भए पश्चात् आफूमा आत्मविश्वास बढेको बताउनुभयो । व्यवसायीहरुमा अझै पनि धेरै विषयहरुमा जानकारी अभाव रहेको कारणले गर्दा सहज तरिकाबाट जानकारी हासिल गर्ने वातावरण तयार हुनुपर्नेमा उहाँले जोड दिनुभयो ।
अर्का सहभागी चन्देश्वरी सकुपायोले भर्खर व्यवसायमा प्रवेश गरेका व्यवसायीलाई तालिम झनै उपलब्धी मुलक भएको बताउनुभयो । उहाँले सफल उद्यमी व्यवसायीहरुसँग पनि अन्तरक्रिया गर्ने अवसर पाएको खण्डमा तालिम थप व्यवहारिक हुने तर्फ पनि ध्यानाकर्षण गराउनुभयो ।
तालिममा विभिन्न क्षेत्रका २५ जना व्यवसायीहरु सहभागी थिए । तालिममा केन्द्रका उपनिर्देशक राजेन्द्र सिं, अर्का उपनिर्देशक सिद्धिचरण दाहाल र केन्द्रकै वरिष्ठ अधिकृत गोविन्द आचार्यले प्रशिक्षण दिनुभएको थियो । सो अवसरमा सहभागीहरुले तालिमका दौरान तयार पारेको अन्तर्राष्ट्रिय बजार सम्भाव्यता सम्बन्धीको परियोजनाहरु समेत प्रस्तुत गरेका थिए ।
