भक्तपुर, जेठ ३१
दक्षिण अमेरिकी राष्ट्र पेरुलाई सडनडेथमा पराजित गर्दै एसियाली मुलुक अष्ट्रेलिया यसै वर्ष कतारमा आयोजना हुने फिफा विश्वकप फुटबल २०२२ का लागि छनोट भएको छ । छनोटको अन्तरदेशिय प्लेअफमा अष्ट्रेलिया पेरुलाई सडनडेथमा ५–४ गोल अन्तरले पराजित गर्दै लगातार छैंटौं पटक विश्वकपका लागि छनोट भएको हो ।
अष्ट्रेलियाका लागि सव्सिच्युट गोलरक्षक एन्ड्रिउ रेडमेन नायक बने । उनले सडनडेथको अन्तिम पेनाल्टी बचाए । उनले पेरुका एलेक्स भालेराको पेनाल्टीलाई रोक्दै अष्ट्रेलियालाई विश्वकपमा पु¥याए ।
कतारको दोहास्थित अहमेद विन अली स्टेडियममा सोमबार राति भएको प्रतिस्पर्धात्मक र रोमाञ्चक खेलमा दुवै टोलीले निर्धारित ९० मिनेट र थप गरिएको ३० मिनेटको खेलमा पनि कुनै गोल गर्न नसकेपछि खेल टाईब्रकेरका लम्बिएको थियो ।
टाइब्रेकरमा अष्ट्रेलियाका मार्टिन बोएलको शुरुवाती पेनाल्टी गोल हुन सकेन । त्यसपछि आरोन मोए, क्रेइग गुडविन, एज्दिन रुस्टिक, जेमी माकलरेन र एवेर मविलले गोल गरे ।
पेरुका जियानलुका लापाडुला, एलेक्सान्डर कालेन्स, रेनाटो तापिया र इडिसन फ्लोरेसले गोल गर्दा लुइस इडभिनकुलाले गोल गर्न नसकेपछि खेल सडनडेथमा पुगेको थियो ।
अष्ट्रेलिया कतार विश्वकपमा छनोट हुने ३१औं टोली बनेको छ । अब कोस्टारिका र न्युजिल्यान्डमध्येबाट एक टोलीले विश्वकपमा स्थान बनाउनेछ । त्यसपछि विश्वकपमा छनोट हुने सबै ३२ राष्ट्रको टुंगो लाग्नेछ ।
विश्वकपमा छनोट हुन अष्ट्रेलियाले प्ले अफमा युनाइटेड अरब इमिरेट्सलाई पराजित गर्दै कन्टिनेन्टल प्ले अफमा पेरुसँगको भेट पक्का गरेको थियो । विश्वकपमा स्थान बनाएको अष्ट्रेलिया च्याम्पियन फ्रान्स, डेनमार्क र ट्युनिसिया रहेको समूह ‘डी’ मा परेको छ ।
