भक्तपुर, जेठ १३
काठमाण्डौं उपत्यका अपराध अनुसन्धान कार्यालयको प्रहरी टोलीले सरकारी जग्गा बिक्रि गर्ने उद्देश्यले बैना लिने दुई कारोवारीलाई भक्तपुरबाट पक्राउ गरेको छ । सरकारी जग्गा बैना गरी ५ करोड २० लाख ठगी गरेको अभियोगमा भक्तपुर चाँगुनारायण–७ का ७२ वर्षीय केशवप्रसाद अधिकारी र भक्तपुर नगरपालिका–८ बस्ने ५८ वर्षका इश्वर गाइजुलाई आज (शुक्रवार) मालपोत कार्यालय भक्तपुरबाट पक्राउ गरेको हो ।
उनीहरुले साविक सुडाल गाविस वडा नम्बर ४ क कित्ता नं. ३९९ को सरकारी जग्गा बिक्रिका लागि बैना वापत करारनामा गरी ५ करोड २० लाख रुपैंया ठगी गरेको उजुरी प्रहरीमा परेको थियो । साथै उनीहरुले साविक सुडाल गाविस वडा नम्बर ४ क मा रहेको अर्कैको नाममा रहेको जग्गा झुक्यानमा पारी बिक्री गर्न करारनामा बनाएको आरोप समेत लागेको छ ।
खोटाङका दिक्तेल रुपाकोट मझुवागढी नगरपालिका–१४ बस्ने धनीराम राईको जाहेरीमा उनीहरुलाई पक्राउ गरिएको काठमाण्डौं उपत्यका अपराध अनुसन्धान कार्यालयका सूचना अधिकारी प्रहरी उपरिक्षक (एसपी) कृष्ण प्रसाद कोइरालाले जानकारी दिनुभयो । उनीहरुलाई थप आवश्यक कारबाहीका लागि जिल्ला प्रहरी परिसर भक्तपुर पठाइएको कार्यालयले जनाएको छ ।
