भक्तपुर, कार्तिक १४
नृत्य निर्देशक संघ नेपाल भक्तपुर जिल्ला शाखाले जिल्लाका चार वटै नगरपालिकाका नव निर्वाचित प्याब्सन नगर कमिटीका सम्पूर्ण पदाधिकारीहरुलाई बधाई ज्ञापनका साथै सम्मान गरेको छ । नमस्ते ख्वप टिभी र नेपाल फोटो संसार प्रा.लि को सहकार्यमा आयोजित कार्यक्रममा मध्यपुर थिमि नगरप्रमुख मदनसुन्दर श्रेष्ठले नवनिर्वाचित प्याब्सनका पदाधिकारीहरुलाई सम्मान गर्नुभएको हो ।
सो अवसरमा नगरप्रमुख श्रेष्ठ नृत्य दिवस मध्यपुर थिमिबाट शुरु गर्ने घोषणा गर्नुभयो । कार्यक्रममा नृत्य निर्देशक संघका केन्द्रीय अध्यक्ष भुवन दास श्रेष्ठ, प्याब्सन केन्द्रीय सचिव भुवन लाल श्रेष्ठ, प्याब्सन केन्द्रीय सह–कोषाध्यक्ष गणेश बाबु पोखरेल, राष्ट्रिय टेलिभिजन प्रसारक संघका अध्यक्ष शंकर अधिकारी, नमस्ते ख्वप टिभी का अध्यक्ष बालकृष्ण श्रेष्ठ लगायतले नृत्य विधालाई थप जनस्तरमा लगेर प्रतिभाको खोजीका लागि प्याब्सन । नृत्य निर्देशक संघले सहकार्य गरेर विद्यालयस्तरमा कक्षा सञ्चालन गर्नुपर्नेमा जोड दिनुभयो ।
सो अवसरमा नृत्य निर्देशक संघ नेपाल भक्तपुर जिल्ला शाखाको राहत कोष तथा नमस्ते ख्वप टिभीको स्टुडियो निर्माणको लागि संघका अध्यक्ष चुडामणि फुयाल, उपाध्यक्ष प्रदिप श्रेष्ठ, दिल कृष्ण प्रजापति, भुवन लाल श्रेष्ठ, विनोद काफ्ले, राम कुमार भट्टराई, कृष्ण कार्की, गणेश बाबु पोखरेल र अनिल न्यौपानेले सहयोग गर्नुभएको थियो ।
नृत्य निर्देशक संघ नेपाल भक्तपुर जिल्ला शाखाका अध्यक्ष चुडामणि फुयालको अध्यक्षतामा सम्पन्न कार्यक्रममा नव गठित नृत्य निर्देशक संघ नेपाल चन्द्रागिरी नगर कमिटिलाई बधाई पत्रद्वारा सम्मान गरिएको थियो ।
