भक्तपुर, माघ २५
मध्यपुर थिमि नगरपालिका वडा लिग फुटबल प्रतियोगिता–२०८० लाई व्यवस्थितरुपमा सञ्चालन गर्न आयोजक मध्यपुर युथ एशोसियसनले बिहिवार विभिन्न समितिहरु गठन गरेको छ ।
मध्यपुर थिमि नगरपालिकाका प्रमुख सुरेन्द्र श्रेष्ठको विशेष उपस्थितीमा बसेको एशोसियसनको बैठकले वडा लिगलाई व्यवस्थित, सभ्य र भव्य रुपमा सफल बनाउन विभिन्न समिति गठन गरेको हो ।
जसअनुसार एशोसियसन अध्यक्ष उपेन्द्रमान सिंहको संयोजकत्वमा प्रतियोगिताको प्राविधिक समिति, उपाध्यक्ष अष्ट कवेको संयोजकत्वमा अनुशासन समिति, हरिदास प्रजापतिको संयोजकत्वमा सल्लाहकार समिति, उज्वल प्रजापतिको संयोजकत्वमा सुरक्षा समिति गठन गरेको छ ।
यसैगरी फिफा रेफ्री अस्मिता मानन्धरको संयोजकत्वमा निर्णायक समिति, मनोज अधिकारीको संयोजकत्वमा स्वास्थ्य समिति, एशोसियसनका सचिव सुरेन्द्र श्रेष्ठ र सहसचिव सुनिल श्रेष्ठको संयोजकत्वमा अतिथी सत्कार, निश्चल शर्माको संयोजकत्वमा मञ्च व्यवस्थापन समिति, जगत प्रजापतिको संयोजकत्वमा प्रचार प्रसार, प्रतिभा अदुवा श्रेष्ठको संयोजकत्वमा स्वयम् सेवक, राजेश श्रेष्ठको संयोजकतत्वमा मैदान व्यवस्थापन समिति र ज्ञानु श्रेष्ठको संयोजकत्वमा खाजा व्यवस्थापन समिति गठन गरिएको अध्यक्ष सिंहले जानकारी दिए ।
प्रतियोगिता यही माघ २९ गतेदेखी फागुन २४ गतेसम्म सानो थिमिस्थित खेल मैदानमा हुनेछ । प्रतियोगितालाई मध्यपुर थिमि नगरपालिकाले प्रायोजन गरेको छ । नगरपालिकाका प्रमुख सुरेन्द्र श्रेष्ठले यसवर्ष प्रतियोगिताका सबै खेलाडीहरुको बिमा गरिएको जानकारी दिए । यसैगरी यसवर्षको प्रतियोगिताको थप व्यस्थित गर्न दर्शकका लागि अस्थायी रुपमा बस्ने व्यवस्था गरिएको छ ।
