भक्तपुर, माघ १०
तारा देवी स्मृति फाउन्डेसनले मंगलवार स्व. तारा देवी श्रेष्ठको १८ औँ पुण्य स्मृतिका अवसरमा ‘सम्झनामा तारा देवी तथा स्रस्टा सम्मान’ कार्यक्रमको आयोजना गरेको छ । काठमाण्डौँ महानगरपालिका, टोखा नगरपालिका र बुढानिलकण्ठ नगरपालिका लगायतको सहकार्यमा सो कार्यक्रमको आयोजना गरिएको हो ।
कार्यक्रममा डेढ दर्जनभन्दा बढी वाद्यवादक समूहको सहायतामा एक दर्जनभन्दा बढी गायक गायिकाले तारादेवीद्वारा स्वरबद्ध गरिएका गीत गाउनुभएको थियो ।
कार्यक्रमको शुरुवातमा रत्न समशेर थापाको रचना तथा संगीत नातिकाजी÷शिव शंकर रहेको ‘मुस्कानका लहरहरु’ बोलको गीतलाई गायक सन्जिव आले मगर र गीता पाण्डेले प्रस्तुत गर्दै कार्यक्रमस्थललाई तारादेवीमय बनाएको थियो । प्रस्तुतिकै क्रममा निशा देसारले विश्व बल्लभको शब्द तथा नातिकाजीको संगीत रहेको ‘शुभकामना’ प्रस्तुत गर्दा माहोल मन्त्रमुग्ध बनाएको थियो ।
कार्यक्रममा गायिकाहरु निशा देसार, गीता पाण्डे, जीना रसाईली, त्रितिया गुरुङ, बबिना भट्टराई देखि शुधा शेर्पा, प्रस्तुति खनाल, अन्जुली हमाल, अग्रिमा रिजाल सम्मका कलाकारहरुले सुमधुर गीत पस्केका थिए । गायिका शर्मीला लामाले धर्मराज थापाको शब्द तथा नातिकाजीको संगीतमा रहेको तारादेवीको ‘कालीपारे दाइ कति राम्रो’ गीत गाउनुभयो ।
कार्यक्रममा ६ वटा युगल प्रस्तुति गरिएको थियो । जसमा किरण खरेलको रचना, दिपक जंगमको संगीत रहेको र दिपक जंगम तथा तारा देवीको स्वर रहेको ‘उनले अङगालो हालेर’ बोलको गीत गायक अजर जंगम तथा गायिका जीना रसाईली, किरण खरेलको शब्द तथा अम्बर गुरुङको संगीत रहेको ‘तिम्रो नाम अझै छ ओठमा’ बोलको गीत अनिल सुनाम तथा बबिना भट्टराईले प्रस्तुत गर्नुभएको थियो ।
राष्ट्रकवि माधवप्रसाद घिमिरेको शब्द तथा नातिकाजी श्रेष्ठको संगीत रहेको ‘फुलको थुंगा’ गीतको गीति नृत्य अनुजा अधिकारी, अस्मिता ढकाल र सलिना मिश्रले प्रस्तुत गर्दा कार्यक्रमका अधिकांशको आँखा रसाएका थिए ।
चांदनी शाहको शब्द तथा नातिकाजी श्रेष्ठको संगीत रहेको ‘उकाली ओरालीहरुमा’ अन्जना श्रेष्ठले प्रस्तुत गर्नुभयो । रत्न समशेर थापाको शब्द तथा शुभ बहादुर सुनामको संगीत रहेको ‘फुलै फुलको मौसम तिमीलाई’ जीना रसाईलीले मिठास सहित गाउनुभयो । कुमार बस्नेतको सङकलन रहेको ‘कर्कलो गाभा’ गीत गीता पाण्डेले प्रस्तुत गर्दा माहोल निकै तातिएको थियो ।
कार्यक्रममा नेपाली सांगीतिक क्षेत्रमा योगदान पुर्याउने तीन अग्रज सष्टाहरु बिशिष्ठ गीतकार बिश्व बल्लभ, बिशिष्ठ संगीतकार दिपक जंगम र बिशिष्ठ गायिका तारा थापालाई जनही २५ हजार, ताम्रपत्र साथै दोसल्ला सहित सम्मान गरिएको थियो । उहाँहरुलाई फाउन्डेसनका संरक्षक रवि श्रेष्ठसहितका पदाधिकारीहरुले सम्मान हस्तारण गर्नुभयो ।
सो अवसरमा तारा देवीको सांगीतिक व्यक्तित्वको चर्चा गर्दै सम्मानीतहरुले उनले स्वर दिएका सबै गीतको उचित संरक्षण हुन नसकेकोमा दुःख व्यक्त गरेका थिए । यसका साथै नेपाली सांगीतिक स्वर्णयुगलाई उचाइमा पुर्याउन तारा देवीको महत्वपूर्ण योगदान रहेको बताउँदैं फाउन्डेसनले तारादेवीको योगदानका बारेमा थप अनुसन्धान गरी सार्वजनिक गर्नुपर्नेमा जोड दिनुभयो ।
तारा देवीको गीत र सिर्जनाको संरक्षण गर्न र नेपाली सांगीतिक क्षेत्रमा बचाइराख्न २०७२ सालमा तारादेवी स्मृति फाउन्डेसनको स्थापना भएको थियो ।
