भक्तपुर, चैत्र २०
नेपाल तरुण दल र नेपाल विद्यार्थी संघ (नेविसंघ)ले संयुक्तरुपमा मंगलवार मध्यपुर थिमिको चारदोवाटो चोकमा प्रदर्शन गर्दै उक्त स्थानको आकाशे पुल छिटो निर्माण गर्न माग गरेका छन ।
आकाशे पुल निर्माणको कार्य लामो समयदेखी रोकिएको र उक्त पुल निर्माण नहुँदा दुर्घटनाको जोखिम बढेको भन्दै नेविसंघ र तरुण दलले संयुक्तरुपमा विरोध प्रदर्शन गरेको हो ।
प्रदर्शनकारीहरुले आकाशे पुल तुरुन्त निर्माण गर, बटुवाको जीवन यात्रा–बेवारिसे पुलबाट वर्षमा कयौं जीवन घाटा, हाम्रो सुरक्षा हाम्रो हक अधुरो निर्माणमा भयो धेरै बकबक, जनताको सुरक्षा ग्यारेन्टी गर जस्ता नारा अंकित प्लेकार्ड बोकेका थिए ।
कार्यक्रमलाई सम्बोधन गर्दै नेपाल तरुण दलका केन्द्रीय सदस्य राजु थापाले भक्तपुरका अलपत्र विकास निर्माणमा तरुण दल र नेविसंघले निरन्तर खबरदारी गरिरहने बताउनुभयो ।
उहाँले राजधानीको व्यस्त सडकमा निर्माण थालेको आकाशे पुल समेत लामो समयसम्म सम्पन्न नहुनुले नेपालको विकास निर्माणमा ठेकेदारले गर्ने लापरवाही र बेइमानी छर्लङ भएको बताउनुभयो । उहाँले यथाशिघ्र उक्त पुल निर्माण सम्पन्न नगरे निर्माण व्यवसायीको घर घेर्न समेत पछि नपर्ने चेतावनी दिनुभयो ।
