भक्तपुर, फागुन १९
फ्रान्सको शिर्ष डिभिजनको महिला लिग फुटबलमा एन अभान्ट ग्वेंगाम्पको जितमा नेपाली राष्ट्रिय महिला टोलीका फरवार्ड सावित्रा भण्डारी ‘साम्बा’ले शनिवार गोल गरेको छ । साम्बाले लिलविरुद्ध महत्वपूर्ण गोल गरेकी हुन । खेलमा ग्वेंगाम्पले साम्बाको गोल मद्दतले २–० गोलको जित निकाल्न सफल भएको हो ।
साम्बा खेलको ८५ औं मिनेटमा मैदान प्रवेश गरेका थिए । मैदान प्रवेश गरेको दोस्रो मिनेटमा उनले निकालेको सुन्दर क्रसमा ग्वेंगाम्पका खेलाडीको हेड गोलपोष्टको बारमा लागेर फर्किएको थियो ।
इन्ज्युरी समयको पहिलो मिनेटमा विपक्षीबाट सहकर्मीले खोसेको बललाई अघि बढाउँदै साम्बाले वन भर्सेस वनमा सुन्दर गोल गर्दै टोलीलाई २–० को अग्रता दिलाइन । खेलको अन्तिम मिनेटमा पनि साम्बाले गोल गर्ने अवसर पाएका थिए तर उनले नियन्त्रण गर्न सकेन । यसअघि खेलको ५६ औं मिनेटमा एन्टोइन स्टारोभाले पेनाल्टीमा गोल गर्दै ग्वेंगाम्पलाई अग्रता दिलाएकी थिइन् ।
साम्बा वाफ च्याम्पियनसिपको फाइनल गुमाएर फ्रान्सको शिर्ष डिभिजनको लिग खेल्न पुगेकी थिइन । यस जितले ग्वेंगाम्प अंक तालिकाको नवौं स्थानमा उक्लिएको छ । १६ खेलमा टोलीको १५ अंक पुगेको छ । रेलिगेसन क्षेत्रबाट अब क्लब ७ अंकले माथि छ ।
