भक्तपुर, फागुन १६
प्रिती राईले खेलको अन्तिम समयमा गरेको मद्दतले नेपाली महिला राष्ट्रिय फुटबल टोली साउदी अरवियामा भइरहेको वाफ महिला च्याम्पियनसिपको फाइनलमा प्रवेश गरेको छ । प्रितीले गएराती सम्पन्न सेमिफाइनलमा दोस्रो हापको इन्जुरी समयमको अन्तिममा गोल गरेपछि नेपाली टोली लेवनानलाई २–१ गोल अन्तरले पराजित गर्दै फाइनलमा प्रवेश गरेको हो । नेपालले अब उपाधिका लागि साविक विजेता जोर्डनको सामना गर्नेछ ।
जेद्दाहस्थित किङ अब्दुल्लाह स्पोर्ट्स सिटी स्टेडिययमा भएको दोस्रो सेमिफाइनलमा नेपालले एक गोलले पछि परेको स्थितीबाट पुनरागमन जित निकालेको हो ।
खेलको ३८औं मिनेटमा नेपाली डिफेण्डर पुजा रानाको आत्मघाती गोलले लेवनानले अग्रता लिएको थियो । पुजाले गोलकिपर एन्जिला तुम्बापोलाई दिएको ब्याक पास गोल हुँदा नेपाल पछि परेको थियो ।
दोस्रो हाफमा नेपालले लगातार गोल फर्काउने प्रयास ग¥यो । अन्ततः ७६औं मिनेटमा मात्र सफलता मिल्यो र खेल बराबरीमा आयो । नेपालका लागि सावित्रा भण्डारीले गोल गर्दै खेल बराबरीमा ल्याएका थिए ।
सावित्राले रश्मी कुमारी घिसिङको पासमा गरेको प्रहार लेवनानी गोलकिर लमिटाले रोकेपनि पूर्ण रुपमा क्लियर गर्न सकिनन् । रिबाउन्ड बल डिफेण्डर अमिनाले क्लियर गर्ने प्रयास गर्दै गर्दा सावित्राले चलाखीपूर्वक अघि बढ्दै गोल गरेकी हुन् ।
जारी प्रतियोगितामा नेपालले खेलेको चारै खेलमा गोल गरेकी सावित्राको यो नवौँ गोल हो । उनले पहिलो खेलमा सिरिया विरुद्ध १ गोल गरेकी थिइन् भने त्यसपछि इराक विरुद्ध ५ र प्यालेस्टाइन विरुद्ध २ गोल गरेकी थिइन् ।
निर्धारित समयमको खेल बराबरीतर्फ अग्रसर भइरहेको बेला प्रिती राईले अन्तिम समयमा गोल गर्दै नेपाललाई जित दिलाइन् । ५ मिनेटको इन्जुरी टाइमको अन्तिममा नेपालले कर्नर पाएको थियो । विमला चौधरीले प्रहार गरेको कर्नर बल लेवनानी खेलाडीले क्लियर गर्न नसकेपछि पेनाल्टी बक्स बाहिर प्रितीले प्राप्त गरिन् र उनले हानेको लङ सट सिधै गोलमा परिणत भयो र नेपालको जित सम्भव भयो ।
पहिलो पटक वाफ च्याम्पियनसिप खेलिरहेको नेपाल अब उपाधिबाट एक कदम मात्र टाढा छ । नेपालले अब उपाधिका लागि बिहिवार साविक विजेता जोर्डनको सामना गर्ने छ ।
फाइनल पुगेपछि नेपालकी फरवार्ड सावित्रा भण्डारीले मैदानका कारण पहिलो हाफमा राम्रो खेल्न नसकेको बताइन् । उनले पहिलो हाफमा मैदानमा एडजस्ट हुन कठिन भएको र बल कन्ट्रोल गर्न नसकिएको बताउँदैं दोस्रो हापमा शतप्रतिशत दिँदै जित निकाल्न सफल भएको बताए ।
“पहिलो हाफमा केही कठिन भयो र दोस्रो हाफमा शत प्रतिशत दियौँ र नतिजा निकाल्न सफल भयौँ,” उनले भने । जोर्डन बलियो टिम भएको र नतिजाका लागि फाइट गर्ने बताइन् । उनले विपक्षीलाई सम्मान गर्दै खेल्ने बताइन् ।
यस्तै गोलकर्ता प्रितीले पनि पहिलो हाफमा खेल्न कठिन भएको र दोस्रो हाफमा खेल्न सहज भएको र नतिजा आएको बताइन् । यस्तै प्रितिले आफ्नो गोल फिजियो नविनालाई समर्पण गर्ने पनि बताइन् । आफ्नो कठिन समयमा नविनाले धेरै सहयोग गरेको प्रितिले बताइन् ।
