भक्तपुर, पुस २२
भक्तपुरको ताथलीस्थित सिम्रिक वचत तथा ऋण सहकारी संस्था लि.को स्वास्थ्य शिविरसहित १४ औं साधारण सभा शनिवार सम्पन्न भएको छ । चाँगुनारायण नगरपालिका वडा नं ९ मा रहेको सो सहकारीको साधारणसभा तथा स्वास्थ्य शिविर सुर्यविनायक गणेश मन्दिर परिसरमा भएको हो । स्वास्थ्य शिविरका लागि नेशनल बाथरोग सेन्टरले प्राविधिक सहयोग गरेको थियो ।
सो सभाको उद्घाटन गर्दै चाँगुनारायण नगरपालिका वडा नं ९ का वडा अध्यक्ष गणेश त्यातले नाफाको पछि लाग्ने स्वभावका सञ्चालक रहेका सहकारीले समुदायमा आधारित क्रियाकलाप नगर्दा समुदायमा आधारित सहकारीसमेत बदनाम हुनु विडम्बना रहेको बताउनुभयो ।
उहाँले पछिल्लो समयमा स्थानीय तहहरूमा बहुउद्देश्यीय सहकारीको संख्या बढेको उल्लेख गर्दै स्थानीय व्यक्तिको सक्रियतामा मात्र सञ्चालित सहकारीमा बचत गर्न अनुरोध गर्नुभयो । वडा अध्यक्ष त्यातले सो अवसरमा सहकारीका उत्कृष्ट बचतकर्ता र ऋणीलाई सम्मान गर्नुभएको थियो ।
कार्यक्रममा मासिक असल बचतकर्ता सम्मानबाट श्यामु बस्नेत, सामुहिक जमानी ऋणतर्फ उत्कृष्ट ऋणी सम्मानबाट मनहरि बस्नेत, धन जमानी ऋणतर्फ उत्कृष्ट ऋणी सम्मानबाट पुस्कर खत्री, उत्कृष्ट बाल बचत सम्मानबाट प्राश्ना न्हेम्हाफुकी र उत्कृष्ट दनिक बचत सम्मानबाट राजु बाला सम्मानीत भएका थिए । ।
कार्यक्रममा सयपत्री साकोसका अध्यक्ष हरिगोपाल बासुकला तथा प्रगति युवा समाजका सचिव रविन्द्र न्हेम्हाफुकीले सहकारीले वित्तीय अनुशासन कायम गरी समुदायका लागि काम गर्न सके सहकारी सिद्धान्तअनुसार काम हुने बताउनुभयो ।
ताथलीको तैकाबु गणेश सांस्कृतिक समूहको सांस्कृतिक प्रस्तुतिका साथ भएको कार्यक्रममा सहकारीका सचिव हरिसुन्दर छुकां, कोषाध्यक्ष अर्जुन सुवेदी, ऋण उपसमिति संयोजक उत्तम साखकर्मी तथा लेखा समिति सदस्य घनश्याम खड्काले प्रतिवेदन प्रस्तुत गरेका थिए ।
सहकारीका अध्यक्ष रमेश न्हेम्हाफुकीको सभापतित्वमा सम्पन्न सो सभामा उहाँले सहकारीलाई थप समुदायमैत्री बनाउने प्रतिवद्धता जनाउनुभयो । वि. सं. २०६७ सालमा स्थापति सो सहकारीमा ५९४ सदस्य रहेका छन् भने आ. व. २०७९÷८० मा ७२ लाख ३४ हजार शेयर पूँजी भएको छ । सहकारीले सोही आर्थिक वर्षमा ३ करोड ७ लाख ५८ हजार बचत संकलन गरि ३ करोड ७३ लाख ३८ हजार रूपैयाँ ऋण लगानी गरेको छ ।
