भक्तपुर, भदौ ३१
काठमाण्डौंको तीनकुने गैह्रीगाउँस्थित दिव्य सः मिलभित्र शुक्रवार राती चार जनाको सामूहिक हत्या गरेको आरोपमा एक जनालाई प्रहरीले पक्राउ गरी आइतवार साँझ सार्वजनिक गरेको छ । सो हत्याको अनुसन्धानका लागि गठित प्रहरी टोलीले हत्यामा संलग्न भएको आरोपमा सिन्धुपाल्चोक बाह्रबिसे नगरपालिकाका सञ्जय भण्डारीलाई पक्राउ गरी सार्वजनिक गरेको हो ।
सिन्धुपाल्चोक जाने तयारी गरिरहेका भण्डारीलाई आइतबार बिहान प्रहरीले काँडाघारीबाट पक्राउ गरेको हो । पक्राउ परेपछि उनले कापीमा ‘आई किल्ड फोर पिपल’ लेखेर बयान दिएका थिए । बोल्न नसक्ने भण्डारीको बयान प्रहरीले दोभाषेको सहयोगमा लिएको जनाएको छ ।
जन्मजात बोल्न नसक्ने भण्डारीलाई जिल्ला प्रहरी परिसर, काठमाडौं र उपत्यका अपराध अनुसन्धान कार्यालयको टोलीले आइतबार काँडाघारी क्षेत्रबाट पक्राउ गरेको थियो । घटना भएको दिन बोकेको झोला र त्यसभित्र घटनामा प्रयोग भएको खुकरीसहित नियन्त्रणमा लिइएको प्रहरीले जनाएको छ ।
उनलाई सीसीटीभी फुटेजका आधारमा पक्राउ गरिएको काठमाडौं उपत्यका अपराध अनुसन्धान कार्यालयका एसएसपी सोमेन्द्रसिंह राठौरले बताउनुभयो । घटनापछि खुकुरीसहित भागेका भण्डारी पेप्सीकोलास्थित साथीको घरमा पुगेका थिए ।
प्रहरीको प्रारम्भिक अनुसन्धानमा भण्डारीको निशानामा सःमिलमा बस्ने नवीन भन्ने विशाल राई थिए । केही पहिले राईले चलाएको मोटरसाइकलले भण्डारीलाई ठक्कर दिएको थियो । त्यस क्रममा राईले नै भण्डारीमाथि कुटपिट गरेका थिए । त्यसको प्रतिशोधमा आफूले यो घटना घटाएको भण्डारीले बयानमा बताएका छन् ।
भण्डारी काँडाघारीस्थित दिदी भिनाजुसँग बस्थे । आउजाउ गर्ने क्रममासःमिलको घर टहरोमा नविनलाई देखेका थिए । घटना भएको दिन पनि उनी राईलाई भेटेर कुराकानी गर्ने, निहुँ खोजे आक्रमण गर्ने भनेर काँडाघारीबाट आएका थिए ।
बेलुकीको समयमा सःमिलमा आइपुगेका उनी पछाडि पट्टीको बन्द गेटबाट चढेर राईको कोठामा पुगेका थिए । केहीबेरमा आएका राईले किन आएको भनेर कुटपिट गरेपछि आफूले खुकुरीले टाउकोमा प्रहार गरेको भण्डारीले स्वीकार गरेको अनुसन्धानमा संलग्न एक प्रहरी अधिकृतले बताए ।
त्यसक्रममा आफूलाई देखेको भनेर अरुलाई आक्रमण गरे । उनले सुरुमा सुभद्रा भुजेल, त्यसपछि पूर्णबहादुर भुजेल र अम्बिकालाई टाउकोमै खुकुरी प्रहार गरेका थिए । घटनापछि उनी फेरि काँडाघारीस्थित दिदीभिनाजुको कोठामा पुगेर सुतेका थिए । भोलिपल्ट शनिबार अरु दिनजस्तै नक्सालस्थित आफू पढेको स्कुलका साथीहरुलाई भेट्न गए ।
आइतबार भने प्रहरीले खोजिरहेको हुनसक्छ भनेर सिन्धुपाल्चोक गएर लुक्ने सोचका साथ हिँडेका थिए । हुलिया मिलेपछि उनलाई नियन्त्रणमा लिएको र उनको साथबाट घटनामा प्रयोग भएको हतियार समेत बरामद भएको एसएसपी सोमेन्द्रसिंह राठौरले बताउनुभयो ।
जन्मजात बोल्न नसक्ने उनको बयान लिन प्रहरीले सांकेतिक भाषा विज्ञलाई झिकाएको थियो । उनले सम्पूर्ण घटना एक्लै घटाएको स्वीकार गरेको, तर अनुसन्धान भइरहेको राठौरले बताउनुभयो ।
तीनकुनेको दिव्य सः मिलमा नवीन राईसहित दोलखा घर भएका कुमार भनिने ५५ वर्षका पूर्णबहादुर भुजेल, श्रीमती अम्बिका भुजेल, आमा शुभद्रा भुजेलको धारिलो हतियार प्रहारबाट हत्या भएको थियो ।
यसअघि प्रहरीले हत्याको आशंकामा घटनास्थलबाटै नियन्त्रणमा लिएका दिपेन्द्र राईसहित हिजो पक्राउ परेका चारै जना छुटेका छन् । घटनाबारे खबर गर्न २८ वर्षका दीपेन्द्र राई तीनकुनेस्थित प्रहरी वृत्त नयाँ बानेश्वर पुगेका थिए । कपडा र जुत्तामा रगत लागेको अवस्थामा पुगेका उनलाई पनि प्रहरीले नियन्त्रणमा लिएर अनुसन्धान गरिरहेको थियो ।
तर, सीसीटीभी फुटेजमा दीपेन्द्र ११ बजेर १३ मिनेटमा सःमिलमा प्रवेश गरेर ११ः३३ मा निस्किएको पाइएको छ । उनी प्रहरी कहाँ पुग्दा ११ः५५ बजेको थियो । यो घटना उनी पुग्नुभन्दा पहिला नै भएको प्रहरीको अनुसन्धानबाट देखिएको छ ।
