भक्तपुर, साउन २३
एक गोलले पछि परेको अवस्था उल्ट्याउँदै नेपाली फुटबल क्लव मच्छिन्द्र एफसीले भुटानी क्लव पारो एफसीलाई ३–२ गोल अन्तरले पराजित गरेको छ । एएफसी कप छनोटको प्रारम्भिक चरण अन्तर्गत मंगलवार काठमाण्डौंको दशरथ रंगशालामा भएको खेलमा मच्छिन्द्र पारो विरुद्ध विजयी भएको हो ।
मच्छिन्द्रले छनोटको दोस्रो चरणमा भारतीय आई लिग क्लव मोहन बगानको सामना गर्ने भएको छ । मच्छिन्द्रको जितमा विमल घर्तीमगर, आयुष घलान र ओलावाले आफिजले गोल गरे । पारोका लागि काजुओ होम्मा र इभान अशान्ते गोल गरे ।
खेलमा शुरुवाती अग्रता पारोले लिएको थियो । पारोले खेलको ७ औं मिनेटमा नै अग्रता बनाए । खेलको ७ औं मिनेटमा पारोका काजुओ होम्माले प्रहार गरेको बल गोलकिपर विशाल श्रेष्ठलाई लाग्दै गोल भएको थियो ।
तर त्यसको ५ मिनेटपछि नै विमलले बराबरी गोल फर्काए । एरिक विष्टको छोटो कर्नर पासमा प्राप्त बललाई आयुषले विमललाई दिए । विमलले हेडमार्फत गोल गर्दै मच्छिन्द्रका लागि बराबरी गरे ।
खेलको १५ औं मिनेटमा आयुषले उत्कृष्ट गोल गरे । विमलले पेनाल्टी स्पट नजिक उपलब् गरेको बलमा आयुषले बाँया खुट्टाले उत्कृष्ट फिनिसिङ निकाल्दै मच्छिन्द्रलाई अग्रता दिलाए ।
खेलको ३९ औं मिनेटमा मच्न्द्रिले अग्रता दोब्बर पारे । ओलावाले आफिजले गोल गरेपछि मछिन्द्रले ३–१ को अग्रता बनाए । आयुषले ओमालाजा करिमलाई उपलब्ध गराएको बल करिमले आलावालेलाई पास दिए र उनले कुनै गल्ती नगरी गोलमा परिणत गरे ।
खेलको पहिलो हापमा मच्छिन्द्रले ३–१ को अग्रता बनाएको थियो । दोस्रो हापमा पारोले थप सुधारिएको खेल प्रदर्शन गरेर मच्न्द्रिलाई दवाबमा राखे । लगातारको आक्रमणपछि खेलको ७१ औं मिनेटमा पारोले दोस्रो गोल गरे । पारोका लागि इभान अशान्तेले गोल गर्दै पारोलाई खेलमा फर्काउने कोशिष गरे । त्यसपछि खेलमा कुनै गोल हुन नसक्दा मच्छिन्द्रले जित हासिल गरे ।
खेलको ७९ औं मिनेटमा करीमको फ्रिकिकले पोस्टको दिशा लिन सकेन । लगत्तै अर्कोतर्फ पारोको डरलाग्दो आक्रमण क्रसबार नजिकबाट आकाशियो । ९० औं मिनेटमा कप्तान विशालले विश्वस्तरीय बचाउ गर्दै मछिन्द्रको जित पक्का गरे । असान्टेको क्रसमा काजुओको ६ यार्ड बक्स भित्रको प्रहारलाई उनले आफ्नो दायाँतर्फ डाइभ दिँदै विफल पारे ।
खेलको इन्ज्युरी समयमा विमलले खाली पोस्टमा बललाई पोस्टको दिशा दिन नसक्दा खेल ३–२ मा सकिएको थियो । इन्ज्युरी समयमा मछिन्द्रका लागि आशिष चौधरीले बाँयातर्फबाट दिएको उत्कृष्ट बल विमलले गोलमा परिणत गर्न भने सकेनन् ।
जितसँगैं मछिन्द्रले अब १६ अगष्टमा भारतको इन्डियन सुपर लिग खेल्ने मोहन बगानसँग कोलकतामा खेल्ने छ । यो खेलको विजेताले बंगलादेशको ढाका अबहानी र माल्दिभ्सको क्लब इगल्स बीचको विजेतासँग अगष्ट २२ मा खेल्ने छ ।
मच्छिन्द्रले दोस्रो पटक एएफसी कप खेलेको हो । शहिद स्मारक लिगमा दोस्रो भएपनि मच्छिन्द्रले यो मौका पाएको हो । लिग विजेता चर्च व्वाईजसँग एएफसी क्लव लाईसेन्स नभएका कारण मच्छिन्द्रले यो मौका पाएको हो । मच्छिन्द्रले सो मौकालाई राम्ररी उपयोग गर्न सफल भएको छ ।
मच्छिन्द्र अघिल्लो पटक एएफसी कपको छनोटको प्रारम्भिक चरणमा श्रीलंकाली क्लवसँग पाराजित भएको थियो । दशरथ रंगशालामा नै भएको खेलमा मच्छिन्द्र १–२ ले स्तब्ध भएको थियो ।
