भक्तपुर, चैत्र १४
‘हाम्रो कला हाम्रो संस्कृति, मध्यपुर थिमि हाम्रो सम्पत्ति’ भन्ने मुल नाराका साथ २०५३ सालमा स्थापना भएको यस मध्यपुर थिमि नगरपालिकाको आज २७ औं स्थापना दिवस भव्य र सभ्यरुपमा मनाउँदैं गर्दा सर्वप्रथम सम्पूर्ण नगरवासीहरुमा हार्दिक शुभकामना व्यक्त गर्दछु ।
२०५४ मा स्थानीय निकायको निर्वाचन हुँदैं गर्दा तत्कालिन ५ वटा गाविस समायोजन गरी स्थापना गरिएको यो नगरपालिकामा २०५४ को निर्वाचित जनप्रतिनिधिहरुको पालादेखी विकासको फड्को मारेको सर्वविदितै छ । त्यसबेलाको सिमित स्रोत साधनका बाबजुद निरन्तर विकास निर्माणका कार्य सञ्चालन गरेको अनुभव त्यसबेलाको जनप्रतिनिधिको हैसियतले मलाई पनि रहेको छ ।
यसवर्षको बैशाखमा सम्पन्न स्थानीय तहको निर्वाचनबाट हामी निर्वाचित भइसकेपछिको यो १० महिने कार्यकालमा हामीले विकास निर्माण कार्यलाई तिव्रता दिँदैं नगरपालिकामा सुशासन कायम राख्न ऐन नियम निर्माणमा जोड दिएका छौं । यस कार्यमा हामीलाई यहाँका राजनीतिक दल, बुद्धिजीवि, कर्मचारी, नगरवासी सम्पूर्णले सहकार्य र सहयोग गरेको पाएका छौं ।
निर्वाचित भए लगत्तै नगरपालिकामा सुशासन कायम राख्न पहिलो नगर अधिवेशनमा ४ वटा ऐन निर्माण गरी पारित गरेको र पछिल्लो नगरसभाको हिउँदे अधिवेशनले फोहोर मैला व्यवस्थापनका लागि आवश्यक ऐन समेत गरी ५ वटा ऐन पारित गरी कार्यान्वयनमा ल्याएका छौं ।
चालु आर्थिक वर्षका २९० योजना मध्ये १९७ वटा योजना सञ्चालन भइरहेको, ४९ वटा सम्पन्न भएको छ । प्रदेश र संघिय सरकारबाट विनियोजित बजेटका योजनाहरु मध्ये २० वटा सडक कालोपत्रे भइसकेको छ ।
स्वबासी जग्गा दर्ता खुल्ला गरी हजारौं परिवारलाई स्वबासी जग्गा दर्ता गरी धनीपुर्जा वितरण गरिएको छ । साँस्कृतिक नगरीलाई जिवन्त बनाउन यहाँको मौलिक नामहरुको जगेर्ना र संरक्षण गर्न मौलिक नाम अभिलेखिकरण तथा प्रतिस्थापन समिति गठन गरी कार्य अघि बढाएको छ ।
मध्यपुर थिमि नगरपालिकालाई गुरुयोजना निर्माण गरी अघि बढ्नुपर्छ भन्ने योजना अनुसार निलबाराही मन्दिरको संरक्षण समेत हुने गरी एउटा विस्तृत परियोजना तयार गर्ने उद्देश्यले हाल डिपिआर तयार भएको र सो डिपिआर अनुसार चाँडो भन्दा चाँडो निर्माण कार्य अघि बढाईनेछ ।
मध्यपुर थिमि नगरपालिकाको सिद्धिकाली क्षेत्रमा परम्परागत पदयात्रा मार्ग ‘वाकिङ पव’ बनाउने उद्देश्यले कार्य अघि बढाईएको छ । सो क्षेत्रमा कुनै पनि भौतिक पुर्वाधार निर्माण नगर्ने र एउटा खुल्ला क्षेत्रको रुपमा शहरी सौन्दर्य कायम गर्ने उद्देश्यले कार्य अघि बढाईएको छ ।
मध्यपुर थिमि परम्परागत र नयाँ आधुनिक शहरी क्षेत्रको रुपमा विकास भइरहेको छ । परम्परागत पुरानो बस्तीलाई पर्यटकीय क्षेत्रको रुपमा विकास गर्ने उद्देश्यले नमुना परियोजना निर्माण शुरु गरेका छौं । यसलाई आगामी नगरसभाले पारित गरी कार्यान्वयनमा लैजाने छौं ।
नगरका पोखरी, पाटी, पौवा निर्माण गर्यौं अब त्यस क्षेत्रका घरहरुलाई पनि परम्परागत स्वरुपमा निर्माण गर्ने, त्यसका लागि भवन निर्माण मापदण्ड तयार गरीसकेको र निर्माण भइसकेको घरहरुलाई पनि परम्परागत शैलीमा पुनर्निमाणका लागि विस्तृत परियोजना निर्माण गरेका छौं ।
शिक्षा क्षेत्रको सुधारका लागि ऐन निर्माण गरी सकेको र नियमावली निर्माणको चरणमा रहेको छ । विद्यालयहरुको शैक्षिक पात्रो निर्माण कार्य अगाडि बढाएको, संस्थागत विद्यालयहरुसँग छलफल गरी शुल्क निर्धारणको कार्य समेत वैज्ञानिक तरिकाले निर्धारण गरिने छ ।
सामुदायिक विद्यालयको स्तरोन्नतीको लागि प्रत्येक विद्यालयको प्रोफाइन निर्माण गरिएको र सोही प्रोफाइल अनुसार विद्यालयको प्रगती विवरण र प्रतिवेदनका आधारमा थप सुविधा प्रदान गर्दै जानेछ ।
स्वास्थ्यतर्फ निर्वाचन घोष्णापत्र अनुसार स्वास्थ्य विमालाई प्राथमिकतामा राखी नगरका ६० देखी ७० वर्ष उमेरका ज्येष्ठ नागरिक र उहाँहरुका परिवारका ५ जनाको निःशुल्क स्वास्थ्य बिमा कार्यान्वयन गरिसकेको छ । हालसम्म १ हजार ५५ जनाले उक्त सेवाको लाभ लिइसकेको छ । ५ वर्षभित्र सम्पूर्ण नगरवासीलाई निःशुल्क स्वास्थ्य सेवा उपलब्ध गराउने योजनाका साथ कार्य भइरहेको छ ।
नगरवासीलाई निःशुल्क रगतको व्यवस्था गरिएको छ । सबै वडामा स्वास्थ्य सेवा बिस्तार गरिएको छ । व्लड बैंक स्थापना गर्ने कार्य अघि बढेको छ । नेपाल कोरिया मैत्री नगरपालिका अस्पतालमा धेरै सुधारका कार्य गरिएको छ । डायलासिस सेवा सञ्चालन गरिएको छ । दन्त रोग, वाथ रोग, बालरोग सम्बन्धी नाक कान घाँटीको सेवा शुरु गरिएको छ । न्यूरो शल्यक्रिया शुरु गरिएको छ । सिटी स्क्यान सेवा छिटै शुरु गरिनेछ ।
मध्यपुर उज्यालो अभियान अन्तर्गत अरनिको राजमार्ग उज्यालो गर्ने कार्य सम्पन्न भइसकेको छ । मध्यपुर थिमिका सबै सडकमा बत्ति बाल्ने उद्देश्यले करिव ४ करोडको टेण्डर प्रक्रिया शुरु गर्ने तयारी भइरहेको छ । नेपाल विद्युत प्राधिकरणको ४० प्रतिशत र नगरपालिकाको ६० प्रतिशतको लागतमा यो योजना सञ्चालन हुनेछ ।
विगत २० वर्षदेखी रोकिएको घरनक्सा नियमित गर्ने प्रक्रिया शुरु गरिएको छ । यस प्रक्रिया अन्तर्गत मध्यपुर थिमिको पुरानो प्राचिन बस्तीहरु थिमि, नगदेश बोडेका पुराना घरहरुको समेत नक्सा पास गरी नियमित गरिनेछ ।
जग्गा एकिकरण आयोजना अन्तर्गत कमेरोटारको डेढलक खोलिएको छ । ठेकेदारले कबुल गरे अनुसार काम गरे असारसम्म अधिकांश सडक कालोपत्रे हुनेछ । खानेपानीको लागि १४ लाख लिटरको ट्यांकी निर्माण भइरहेको र उक्त ट्यांकी निर्माण सम्पन्न भएपछि पानीको नियमित स्रोत व्यवस्थापन गरी वितरणको व्यवस्था मिलाईनेछ ।
बोडेको खानेपानी योजनामा थप बोरिङ गरेर दैनिक २ करोड लिटर पानी उत्पादन गर्ने योजना अघि बढाईएको छ । सिन्टिटारको व्यवस्थापन नगरपालिका मातहात आइसकेपछि उपभोक्ता समिति र व्यवस्थापन उपसमितिको बैठक बसी पुर्वाधार निर्माणको कार्य अघि बढाईएको छ ।
दिव्यश्वरी जग्गा एकिकरण आयोजनाको पनि व्यवस्थापन उपसमितिको बैठक बसी त्यहाँको पनि डेढलक खोलिएको छ । त्यहाँको पनि पुवार्धार निर्माणको कार्य बढाईएको छ । विगतमा नगरपालिकाले ६ वटा जग्गा एकिकरण आयोजना सञ्चालन गर्ने निर्णय गरेकोमा ती आयोजना सञ्चालनको लागि सम्भाव्यता अध्ययन शुरु गरिएको छ । यो प्राविधिक अध्ययन २ महिना भित्रमा सम्पन्न गरी कुन कुन ठाउँमा जग्गा एकिकरण आयोजना लागु गर्ने र कुन कुन ठाउँमा सम्भव छैन सो अनुसार आगामी नगरसभाले निर्णय गरी कार्यान्वयन गर्ने योजना छ ।
पर्यटन क्षेत्रको विकासका लागि विदेशी पर्यटकलाई आकर्षित गर्न, यहाँका कला सँस्कृति संरक्षण गरी होम स्टेको अवधारणा अघि बढाएका छौं ।
फोहोर मैला व्यवस्थापनका लागि ऐन निर्माण गरिएको, नीजि क्षेत्रसँग सहकार्य र समन्वयमा एक महिनाभित्र ठोस कदम चाल्ने उद्देश्यले कार्य भइरहेको छ । मध्यपुर थिमि सफाई अभियान राजमार्गमा मात्र सिमित नगरी नगरका हरेक सडकमा सञ्चालन गरिने छ ।
ढल निकास र सडक स्त्तोरन्नतीका लागि प्रदेश र संघिय सरकारका निकायसँग समन्वय सहकार्य गरी नगरका सबै सडकमा कालोपत्रे गर्ने योजना अघि बढाईएको छ ।
आर्थिक मन्दीका कारण यसवर्ष बजेट कटौती भएको र सरकारबाट प्राप्त हुनुपर्ने करिव ३५ करोड मध्ये हालसम्म ६ करोड मात्र प्राप्त भएकाले अब थप ५÷६ करोड मात्र आउने अवस्था रहेको छ । यसले आगामी वर्षको बजेट निर्माणमा समेत कठिनाई भइरहेको अवस्था छ ।
आन्तरिक स्रोत बृद्धि गर्नुपर्ने भएकाले व्यवसाय दर्ता अभियान शुरु गरिएको र अभियान अन्तर्गत व्यवसायीहरुले स्वतःस्फुर्तरुपमा नगरपालिकालाई सहयोग गरेको पाईएको छ । नगरपालिकालाई बुझाउनु पर्ने शुल्क अनलाईन मार्फत भुक्तानी गर्ने व्यवस्थाका लागि अर्को हप्ताबाट क्युआरकोड लागु गर्ने तयारी पुरा भएको छ ।
खेलकुदतर्फ पहिलो पटक मध्यपुर फुटबल लिग र राष्ट्रपति रनिङ शिल्ड प्रतियोगिता सञ्चालन गरिएको छ । अन्य विविध खेलकुद प्रतियोगिताहरु पनि सञ्चालन भएका छन ।
आवधिक योजना अन्तर्गत नगरका विभिन्न स्थानको पहिरो नियन्त्रण तथा पार्क निर्माण, हात्ति महांकाल पहिरो नियन्त्रण तथा सरसफाई , नगरपालिकाको प्रशासनिक भवन, सानो थिमि एसओएस स्कुल अगाडिको पार्क, विगत धेरै वर्षदेखी निर्माण हुन नसकेको गाँखु निकोशेराको ढल निर्माण, क्षयरोग अस्पताल पछाडिको पार्क निर्माण कार्यलाई अघि बढाएको छ ।
अन्त्यमा नगरपालिकाको २७ औं स्थापना दिवस कार्यक्रमलाई भव्य र सभ्यरुपमा सफल बनाउन उपस्थित हुनुहुने प्रमुख अतिथी, विशेष अतिथी, अतिथीगण, विभिन्न संघसंस्था, सहकारी, विद्यालय, सुरक्षाकर्मी, सञ्चारकर्मी र स्थानीय नगरवासीहरुमा हार्दिक धन्यवाद दिन चाहन्छु । धन्यवाद ! जय नेपाल ! जय मध्यपुर थिमि !
(मध्यपुर थिमि नगरपालिकाको आज २७ औं स्थापना दिवसको अवसरमा बोडेको कुमारी द्यो परिसरमा आयोजित कार्यक्रममा गरिएको सम्बोधनको सम्पादित अंश )
