भक्तपुर, मंसिर १४
फिफा विश्वकप फुटबल प्रतियोगितामा अफ्रिकी मुलुक सेनेगल २० वर्षपछि नकआउट चरणमा प्रवेश गर्दा प्रशिक्षक अलिओउ सिसेलाई अनौठो संयोग जुरेको छ । सेनेगल मंगलवार राती सम्पन्न खेलमा इक्वेडरलाई २–१ ले पराजित गर्दै अन्तिम १६ मा प्रवेश गरेको हो ।
यसअघि सेनेगल २० वर्ष अघि सन् २००२ को विश्वकपमा अन्तिम १६ को यात्रा तय गर्दै क्याटर फाइनलसम्म पुगेको थियो । सन् २००२ मा साविक विजेता फ्रान्सलाई नै हराएर सनसनी मच्चाउँदै क्वाटरफाइनलको यात्रा तय गर्दा हालका प्रशिक्षक सिसे सेनेगलका कप्तान थिए । उनै सिसेको प्रशिक्षणमा रहेको सेनेगल २० वर्षपछि विश्वकपको नकआउटमा चरणमा प्रवेश गर्दा उनी कप्तान र प्रशिक्षकका रुपमा सेनेगललाई विश्वकपको नकआउट चरणमा पुर्याउने संयोग जुरेको हो ।
उनकै प्रशिक्षणमा सेनेगलले गत वर्ष अफ्रिकन कप अफ नेसन्सको उपाधि समेत जितेको थियो । सिसेले सेनेगललाई कप्तान र प्रशिक्षकको रुपमा पनि अफ्रिकन कपको फाइनलमा पु¥याएका थिए । खेलाडीको रुपमा जित्न नसकेको अफ्रिकन कप उनले प्रशिक्षकको रुपमा जितेका थिए । अहिले उनी सेनगल फुटबलको लेजेण्डको रुपमा रहेका छन् ।
सेनेगलले दोस्रो पटक २०१८ मा विश्वकप खेल्दा समूह चरणबाटै बाहिरिएको थियो भने अहिले तेस्रो पटक खेल्दा फेरि नकआउट चरण पुग्न सफल भएको हो ।
विश्वकपको मुखैमा स्टार फरवार्ड एवम् कप्तान साडियो माने घाइते हुँदा सेनेगललाई सुरुमै झड्का लागेको थियो । सेनेगल पहिलो खेलमा नेदरल्याण्ड्ससँग पराजित भएको थियो भने दोस्रो खेलमा आयोजक कतारलाई ३–१ ले र तेस्रो तथा निर्णायक खेलमा इक्वेडरलाई २–१ ले पराजित गर्दै नकआउट चरणमा प्रवेश गरेको हो ।
