भक्तपुर, मंसिर १३
समूह चरणमा लगातार दुई खेलमा जित हासिल गर्दै पोर्चुगल फिफा विश्वकप २०२२ को नकआउट चरणमा प्रवेश गरेको छ । विश्वकपमा समूह चरणका अन्तिम खेल अगावै नकआउट चरणमा प्रवेश गर्ने पोर्चुगल तेस्रो टोली बनेको छ । यसअघि साविक विजेता फ्रान्स र पुर्व विजेता ब्राजिल नकआउट चरणमा प्रवेश गरेको थियो ।
पोर्चुगललाई दोस्रो जित दिलाउन सोमवार राती भएको उरुग्वे विरुद्धको खेलमा ब्रुनो फर्नान्डेसले दुई गोल गरे । उनले खेलको ५४ औं मिनेटमा पहिलो गोल र दोस्रो हाफको इन्ज्युरी समयमा पेनाल्टीमार्फत दोस्रो गोल गरेका थिए ।
खेलको ५४ औं मिनेटमा फर्नान्डेसले पेनाल्टी क्षेत्र बाहिरबाट रोनाल्डोतर्फ दिएको लामो पास गोलमा परिणत भएको थियो । रोनाल्डो हेडका लागि उफ्रेको अवस्थामा गोलरक्षक सर्जियो रोसेटले बलको दिशा बुझ्न नसक्दा गोल सम्भव भएको थियो ।
फर्नान्डेसले दोस्रो हापको इन्ज्युरी समयको पहिलो मिनेटमा पोर्चुगलका लागि पेनाल्टीमा दोस्रो गोल गरे । भिडियो एसिसेन्ट रेफ्रीले उरुग्वेको बक्सभित्र ह्यान्ड भएको निर्णय लिएपछि प्राप्त पेनाल्टीमा फर्नान्डेसले गोल गरेका थिए ।
निकै प्रतिस्पर्धात्मक खेलमा दुवै टोलीले गोलको अवसर पाएका थिए । उरुग्वे तुलनात्मक रूपमा आक्रमक देखिएको थियो । बल पोसेसनमा सहज देखिएको पोर्चुगलविरुद्ध उरुग्वे काउन्टर अट्याकमा समस्या दिन सफल भएको थियो । खेलमा १–० ले पछाडी परेपछि आक्रमणमा जोड दिएपनि उरुग्वेले बराबरी गोल फर्काउन सकेन ।
खेलको तेस्रो मिनेटमै पोर्चुगलले पोस्टमा आक्रमण गर्ने अवसर पाएको थियो । रोनाल्डोले छातीले दिएको पासमा विलियम कार्भाल्होले पेनाल्टी क्षेत्र भित्रबाट भली प्रहार पोस्टभन्दा निकै माथिबाट गएको थियो ।
खेलको ३२ औं मिनेटमा उरुग्वेले अग्रता लिने सुवर्ण अवसर खेर फाल्यो । रोड्रीगो बेन्टान्कुरले मिडफिल्डबाट एक्लै बल बढाउँदै पोर्चुगलको डिफेन्स लाइन बिट गरे । उत्कृष्ट बल नियन्त्रण गर्दै पेनाल्टी क्षेत्र भित्रबाट वन भर्सेस वनको स्थितिमा उनको प्रहार गोलरक्षक डिओगो कोस्टाले बचाए ।
७५ औं मिनेटमा उरुग्वेका म्याक्सी गोमेजको प्रहारमा गोलरक्षक कोस्टा बाधक बने । लगत्तै फ्रिकिकमा आएको रिबाउन्डमा लुइस सुआरेज बललाई पोस्टको दिशा दिनबाट चुके । त्यसको एक मिनेट नबित्दै फेडे भालभर्डेको पासमा जिअर्जिअन डे आरासेटाको चिप प्रहार कोस्टाले दोस्रो प्रयासमा जोगाए ।
जितसँगै पोर्चुगल ६ अंक सहित नकआउट चरणका स्थान पक्का गरेको हो । समूहमा घानाको ३ अंक छ भने उरुग्वे र दक्षिण कोरियाको १–१ अंक छ । सोमवार नै सम्पन्न अर्को खेलमा घानाले दक्षिण कोरियालाई पराजित गर्दै महत्वपूर्ण ३ अंक बटुलेको हो । समूहको अन्तिम खेलमा पोर्चुगलले दक्षिण कोरिया र घानाले उरुग्वेको सामना गर्नेछ ।
