भक्तपुर, मंसिर १२
कतारमा जारी फिफा विश्वकप २०२२ मा आइतवार राती सम्पन्न खेलमा जर्मनीले स्पेनलाई बराबरीमा रोक्दै महत्वपूर्ण एक अंक बटुल्नुका साथै दोस्रो चरण प्रवेशको आशा कायम राखेको छ ।
अल बेयत रंगशालामा सम्पन्न खेलको दोस्रो हापमा स्पेनले अग्रता लिएपनि जर्मनीले ८३ औं मिनेटमा गोल फर्काउँदैं खेलमा फर्केको हो । दुवै टोलीका लागि वैकल्पिक खेलाडीले गोल गरेका थिए ।
खेलको ६२ औं मिनेटमा स्पेनका वैकल्पिक फरवार्ड अल्भारो मोराटाले गोल गर्दै टोलीलाई अग्रता दिलाए । उनले जोर्डी अल्बाको क्रसमा ६ यार्ड बक्सको अगाडिबाट गोल गरेका हुन । जर्मन गोलरक्षक नोएर र डिफेन्डर निकलास सुलको बिचमा पसेर मोराटाले फिनिस गरेका थिए ।
खेलको ८३ औं मिनेटमा जर्मनीले बराबरी गोल फर्कायो । स्पेनले आफ्नै हाफमा बल गुमाएपछि काउन्टरमा जर्मनीका लागि निकलास फुलक्रुगले जाल मुसियालाले नियन्त्रणमा लिएको बलमा पेनाल्टी क्षेत्रको ठिक भित्रबाट शक्तिशाली प्रहार गर्दै बराबरी गोल गरे ।
खेलमा स्पेन शुरुवाती अग्रता लिनबाट चुकेको थियो । बल पोसेसन राख्दै अगाडि बढेको स्पेनको छैटौं मिनेटमा अग्रता लिने प्रयासमा क्रसबार बाधक बन्यो । ड्यानी ओल्मोले पेनाल्टी क्षेत्र बाहिरबाट गरेको शक्तिशाली प्रहार गोलरक्षक म्यानुएल नोएरले छेक्दापनि क्रसबारमा लागेर बाहिरियो ।
खेलको ४० औं मिनेटमा जर्मनीले गोल गरेपनि त्यसले मान्यता पाएन । एनेटोनियो रुडिगरले फ्रिकिकमा हेडरमार्फत गोल गरेपनि उनी अफसाइड रहेको भिएआर (भार)मा देखिएको थियो ।
यस समूहमा अब चारै टोलीको अघि बढ्ने सम्भावना रहेको छ । स्पेन ४ अंकसहित शीर्ष स्थानमा छ । जापान र कोस्टारिकाको ३–३ अंक तथा जर्मनी एक अंकसहित पुछारमा छ ।
