भक्तपुर, चैत्र १९
नेपाली कांग्रेस जिल्ला कार्यसमिति भक्तपुरले स्थानीय तहको निर्वाचनका लागि उम्मेदवार छनोटको प्रक्रिया शुरु गर्ने तयारी गरेको छ । त्यसका लागि शनिवार पार्टी जिल्लाका पदाधिकारी, क्षेत्रीय सभापति, प्रदेशसभा क्षेत्रीय सभापति र नगर सभापतिहरुको बैठक बोलाएको स्रोतले जानकारी दिएको छ ।
केही सञ्चारमाध्यमहरुमा नेपाली कांग्रेसको ‘स्थानीय तह निर्वाचन केन्द्रीय परिचालन समिति’ ले उम्मेदवार टुंग्याउने समय तालिका निर्धारण गरेको भन्ने व्यहोरोको समाचार प्रकाशन भएको थियो । सो सम्बन्धमा जिल्लाका पदाधिकारीहरुले कांग्रेस कार्यबहाक सभापति एवम् ‘स्थानीय तह निर्वाचन केन्द्रीय परिचालन समितिका संयोजक पूर्णबहादुर खड्कासँग टेलिफोन सम्पर्क गरी जानकारी लिएको स्रोतले बताए ।
खड्काले समाचारमा आए अनुसार नै भएको जानकारी दिएपछि नेपाली कांग्रेस भक्तपुरले उम्मेदवार छनोटको प्रक्रिया शुरु गर्ने तयारी गरेको हो । ‘कुनै लिखित परिपत्र आएको छैन । उपसभापति पूर्णबहादुर खड्कासँग टेलिफोन सम्पर्क हुँदा तयारी गर्नु भन्ने निर्देशन भएको छ । सोही अनुसार उम्मेदवार छनोटको प्रक्रिया शुरु गर्ने तयारी भएको हो,’ कांग्रेसका एक जिल्ला पदाधिकारीले भने ।
नेपाली कांग्रेसको विधानको दफा ३२ को उपदफा १ ले प्रतिनिधिसभा निर्वाचन क्षेत्रीय कार्यसमितिले गठन गर्ने संसदीय समितिले गाउँ, नगर वडाका सदस्य र अध्यक्षको उम्मेदवारी टुंगो गर्ने व्यवस्था छ । त्यस्तै उपदफा २ ले गाउँपालिकाको अध्यक्ष र उपाध्यक्षको उम्मेदवारी जिल्ला कार्यसमितिले गठन गर्ने संसदिय समिति, उपदफा ३ मा नगरपालिकाका प्रमुख र उपप्रमुखको उम्मेदवारी प्रदेश कार्यसमितिले गठन गर्ने संसदिय समिति र उपदफा ४ मा महानगरपालिका प्रमुख उपप्रमुखको उम्मेदवारी केन्द्रीय समितिको संसदिय समितिले गर्ने व्यवस्था छ ।
