भक्तपुर, पुस १२
नेपाल मजदुर किसान पार्टीले यही पुस १६ गते राजधानी काठमाण्डौंमा अमेरिकी मिलिनियम च्यालेन्ज कर्पो्सन (एमसीसी) सम्झौता विरुद्ध प्रदर्शन गर्ने भएको छ । नेमकिपाको हालै सम्पन्न केन्द्रीय परिषद बैठकको निर्णय अनुसार नेमकिपाले काठमाण्डौंमा एमसीसी विरुद्ध प्रदर्शन गर्न लागेको हो ।
प्रदर्शनको तयारी भइरहेको जनाउँदैं नेमकिपा स्रोतले अहिले नै प्रदर्शनको मोडालिटी कस्तो हुन्छ भन्ने प्रष्ट भइनसकेको बताए । ‘प्रदर्शन गर्ने भन्ने निर्णय भएको छ । कहाँ कहाँ प्रदर्शन गर्ने, कुन कुन ठाउँबाट जुलुश निकाल्ने भन्ने बारे तयारी र छलफल भइरहेको छ,’ स्रोतले भने, प्रदर्शनको विस्तृत कार्यक्रम एक दुई दिनभित्र सार्वजनिक हुन्छ ।
नेमकिपाले एमसीसी सम्झौता राष्ट्रघाती भएको दावी गर्दै यसको विरुद्धमा प्रदर्शन गर्दै आइरहेको छ । नेमकिपाले यसअघि पनि राजधानीमा पटक पटक विशाल जनसहभागिता सहित प्रदर्शन गरी सकेको छ भने भक्तपुरमा पनि विभिन्न स्थानमा प्रदर्शन गर्दै एमसीसी विरुद्ध जनतालाई सचेत पार्दै आएको छ ।
