सुनीता तुलाधर, ललितपुर, कार्तिक १३
भिक्षु सुमेध महास्थविरले कथिन चीवर भिक्षु संघसँग सम्बन्धित भएकोले सर्वप्रथम संघगुणबारे बुझ्नुपर्ने बताउनुभएको छ । अग्ग महासद्धम्म जोतिकधज भिक्षु शीलभद्र महास्थविरले ४६ औं वर्षावास पूरा गर्नुभएको उपलक्ष्यमा पट्को, ललितपुरस्थित ‘मणिमण्डप महाविहार’मा शनिवार आयोजित ‘कथिन चीवर दान’ कार्यक्रममा भिक्षु सुमेध महास्थविरले ९ वटा संघगुण स्मरण गराउनुभयो ।
उहाँले निर्वाण प्राप्तिका लागि भगवान बुद्धले देखाउनु भएको बाटोमा सही तरिकाले लागिरहेका श्रावकहरुको संघ भएकोले ‘सुप्पटिपन्नो भगवतो सावकोसंघो’ भनिएको बताउनुभयो । उहाँका अनुसार ९ वटा गुणहरुमा सुप्पटिपन्नो, उजुप्पटिपन्नो, ञायप्पटिपन्नो, सामिचीप्पटिपन्नो, अट्ठ–पुरिसपुग्गला, आहुनेय्यो, पाहुनेय्यो, दक्खिणेय्यो, अञ्जलिकरणीयो, अनुत्तरं पुञ्ञक्खेत्तं हुन ।
भगवान बुद्धको समयमा उहाँका श्रावकहरु कस्तो आचरण गरी निर्वाण प्राप्त गर्दछन भन्ने विषयमा धम्मपदमा रहेको चक्खुपाल स्थविरको विषयमा उहाँले उपदेश दिनुभयो ।
धर्मदेशना पश्चात भिक्षु महासंघलाई मंगलदास एवं गंगा अवालेसहित सपरिवारले कथिनचीवर दान गर्नुभएको थियो । साथै श्रद्धालु उपासकउपासिकाहरुले अष्ट परिष्कार पनि दान गर्नुभएको थियो ।
कार्यक्रमको शुरुवातमा कथिनदाता मंगलदास अवालेको निवास खपिन्छेँ, ललितपुरदेखि बाजागाजाका साथ शोभायात्रा गरि कथिनचीवरलाई विहार पुर्याइएको थियो ।
कार्यक्रमको अन्तमा उपस्थित उपासकउपासिकाहरुले विभिन्न विहारहरुबाट आउनुभएका भिक्षुगण, गुरुमाहरुलाई दान प्रदान गरेका थिए ।
