लक्ष्मी गारु, भक्तपुर, असोज २०
कुनै समय हरेक नेवार समुदायको घरघरमा गाग्री, ध्याम्पो लगायतका भाँडाकुँडा बिसाउने वस्तु हो प्यँचाः(परालले बनाएको गोलो वस्तु)। आधुनिक प्रविधिसँगै नयाँ नयाँ वस्तुको प्रयोग बृद्धि भएसँगै प्यँचाःको प्रयोग लोप हुने अवस्थामा पुगेपनि दशैंमा जमरा राख्ने भ्य्य बिसाउन भने यसको प्रयोगमा कुनै कमी आएको छैन । नेवार समुदायमा घटस्थापनाको दिन जमरा राख्ने भ्य्य (भ्यूँत) बिसाउन प्यँचाःलाई आशनको रुपमा राखिने परम्परा छ ।
प्यँचाः बनाउँदैं गरकी भक्तपुर खँलाकी नानीछोरी चवाले भन्नुभयो, “यो वर्षको नयाँ धानको हरियो पराल हो । घटस्थापनामा जमरा राख्ने भ्य्य राख्ने आशनको लागि नयाँ परालको प्यँचा चाहिन्छ भन्ने मान्यता छ । सबैको धानखेती हुन्छ भन्ने छैन । नहुनेले लिन आउँछ, दिनुपर्छ धर्मको काम भएकोले प्यँचाः बनाएको हो ।”
नेवार समुदायले आश्विन शुक्ल प्रतिपदाको दिन आ–आफ्नो घरको पूजाकोठामा मोहनी नखाःको आव्हान र नवदुर्गा भवानीको संकल्प गरी माटोको नयाँ भ्य्यमा जमरा राख्ने परम्परा छ । सो जमरा राखेको भ्य्यलाई परालले बनेको आसन प्यँचाःमा राख्ने प्रचलन रहेको छ ।
पछिल्लो समय भक्तपुरमा प्यँचाःको प्रयोग नेवार समुदायमा मात्र सिमित नभएर अरु समुदायमा पनि बिस्तार हुन थालेका छ । विषेश गरी नेवार समुदायले मात्र प्रयोगमा ल्याउने प्यँचाः अहिले स्थानिय क्षेत्री बाहुनले समेत प्रयोगमा ल्याएको चवाल बताउँछिन ।
गएका वर्षहरुमा प्रयोग भैसकेको प्यँचाः पुनः प्रयोगमा ल्याई जमरा हाल्न नमिल्ने नेवारी परम्परा छ । त्यसकारण प्रत्येक वर्ष आश्विन शुक्ल प्रतिपदाको दिन जमरा राख्न प्यँचाः बनाउने काममा उनी व्यस्त रहने गर्छिन् ।
उहाँका अनुसार आश्विन शुक्ल प्रतिपदाको दिनदेखि पुर्णिमासम्म १५ दिन राखिराख्ने जमरा माटोकै भाँडामा राख्ने भएकाले त्यसलाई जोगाउन र संरक्षण दिन प्यँचाःको आशन राख्ने गरिएको हो । “माटोको भाँडो एकदमै कमजोर हुने भएकाले त्यसको संरक्षणको निम्ति प्यँचाःको प्रयोग गरेको हो । नेवार समुदायमा जमरा राखेपछि भ्य्य फुट्यो भने घरमा अशुभ, अशान्ति, अनिष्ट हुने धार्मिक विश्वासले पनि प्यँचाः प्रयोग गरिएको हो, उहाँले भन्नुभयो ।
विगतका केही वर्षदेखी घटस्थापनाको लागि प्यँचाः बनाउने काम थालेको चवाले यो पैसाको लागि नभएको बताउँछन । “यो काम मैले पैसा कमाउनका लागि होइन । धर्म लाग्ने आशमा शुरु गरेको हुँ । प्यँचाः बनाई दिएवापत अहिलेसम्म कसैसँग पैसा लिएको छैन ।” उहाँले भन्नुभयो ।
प्यँचाः बनाउन खासै समय नलाग्ने चवाल बताउँछन । उहाँले भन्नुभयो “हरियो परालको प्यँचाः बनाउन अलि गाह्रो छ । घाउ लाग्ने डर छ, खासै समय चाहीँ लाग्दैन । तर घटस्थापना गर्न नयाँ हरियो पराल चाहिने भएकाले दुई तिन दिन अगाडिदेखि नै पराल घरमा ल्याई बनाउने केही समय अगाडि छरिएर पानी छर्ने हो । अली नरम भएपछि ४÷५ वटा पराल लिई गोलो घेरा बनाई घुमाई घुमाई प्यँचाः तयार गर्ने हो ।”
नेवार समुदायमा माटोको भाँडोलाई मिलाएर राख्न प्रयोग हुने प्यँचाः पछिल्लो समयमा आधुनिक सामानहरु आएका कारण हराउँदै गएको हो । पहिला पहिला माटोको ध्याम्पो, गाग्री, खाना पकाउने भाँडो लगायत भाँडोहरुमा प्रयोग हुने प्यँचाः घरघरमा स्टिल, ढलोट, काँस, पित्तल र सिलावरजस्ता धातुको सामाग्रीको प्रयोगले अहिले पुर्ण रुपमा लोप भैसकेको छ ।
नेवार संस्कृतिमा पराल जन्म देखि मृत्यु संस्कारसम्म प्रयोग हुने गरेको छ । विषेश गरी भक्तपुर किसान समुदायको वर्चश्व रहेको ठाउँ हो । यहाँको हरेक संस्कार परालबाट सुरुवाट गरी परालबाटै अन्त्य गरिन्छ ।
नेवार समुदायमा बच्चा जन्मिदा नचोखाएसम्म सुत्केरी र बच्चालाई परालमा सुताइने परम्परा अहिले पनि भक्तपुर छ । मृत्यु हुँदा पनि घरमै मरेको खण्डमा छिँडीमा गोबरले लिपेर त्यसको माथि पराल राखी मृतकलाई राख्ने प्रचलन छ । मृत्यु संस्कारमा नेवार समुदायले सात दिनमा मृतकलाई भात दिँदा सानो ध्याम्पोको तल प्यँचाः राख्ने परम्परा रहेको छ ।
भक्तपुरमा हरेक धार्मिक तथा साँस्कृतिक कार्यमा परालको विषेश महत्व रहेको छ । नेवार समुदायमा चाडपर्वको सुरुवात मानिने गठेंमुगः च¥हेमा परालबाटै घण्टाकर्ण राक्षसको प्रतिक निर्माण प्रचलन अहिले पनि जीवितै छ ।
इतिहास तथा संस्कृतिकर्मी प्रा.डा पुरुषोत्तमलोचन श्रेष्ठले पराल भैरवको प्रतिकका रुपमा लिन मिल्ने बताए । उहाँले उदाहरण दिँदै भन्नुभयो “गाईजात्रामा सापारुको साँझ परालबाट बनाइएको आकाश भैरवको प्रतिक गाईलाई नगर परिक्रमा गराई सापारुको समापन गरिन्छ । यस मानेमा पराल भनेको भैरव हो । भैरव महादेवको एक अर्को रुप हो । घटस्थापना गर्दा प्यँचाःमा भ्य्य राखी जमरा हाल्नु भनेको नवदुर्गा भवानीको रक्षकको रुपमा शिवलाई राखेको हो । यसलाई शिव शक्तिको मिलनका रुपमा पनि लिन सकिन्छ ।”
