जगत प्रजापति, भक्तपुर असार १०
नेपाली कांगे्रस जिल्ला कार्यसमिति भक्तपुरले सिन्धुपाल्चोकको हेलम्बू गाउँपालिकाका बाढी पिडितलाई बिहिवार राहत वितरण गरेको छ । भक्तपुरमा संकलन गरिएको खाद्यान्न सामग्री कांग्रेस जिल्ला उपसभापति हरि नेपालको नेतृत्वमा नेपाली कांग्रेस बागमति प्रदेशका संसदिय दलका उपनेता एवम् प्रदेशसभा सदस्य कृष्णलाल भँडेल, क्षेत्रीय सभापतिद्धय जीवन खत्री र नारायणभक्त खायमली, जिल्ला सचिव निशान ढुंगेल, जिल्ला सदस्य सुशिल बस्नेत, भक्तपुरका वरिष्ठ नेता राजाराम खड्का, क्षेत्र नं. १ का क्षेत्रीय सचिव जनक खत्री, नेपाल तरुण दल भक्तपुरका अध्यक्ष राजु थापासहितको टोली हेलम्बु गाउँपालिका ३ तारामाराङ पुगेर राहत वितरण गरेको हो ।
राहत सामग्री उपसभापति नेपालले हेलम्बु गाउँपालिकाका कार्यपालिका सदस्य लक्ष्मी सुनारलाई हस्तान्तरण गरेपछि स्थानीय नेपाली कांग्रेसका नेता एवम् समाजसेवी नारायण गिरीको व्यवस्थापनमा स्थानीय बाढी पिडितलाई वितरण गर्नुभएको थियो ।
गिरीले स्थानीय ६१ परिवारलाई राहत सामग्री वितरण गरिएको जानकारी दिनुभयो । भक्तपुरबाट कांग्रेसको टोली ९० बोरा चामल, चिउरा, तेल, दाल, सोयाविनलगायतका खाद्यान्न लिएर हेलम्बु पुगेको थियो । टोलीलाई जिल्ला सभापति दुर्लभ थापाले राहत व्यवस्थितरुपमा स्थानीय वास्तविक पिडितको हातमा पर्नेगरी वितरण गर्न निर्देशन दिनुभएको थियो ।
राहत वितरणका लागि नेपाली कांग्रेसका केन्द्रीय सदस्य एवम् नेपाली कांग्रेस केन्द्रीय विपद व्यवस्थापन समितिका संयोजक मोहनबहादुर बस्नेतले स्थानीयस्तरमा सहजीकरण गर्नुभएको थियो ।
सो अवसरमा जिल्ला सचिव निशान ढुंगेलले गत असार १ गते मेलम्ची नदिमा आएको बाढीले हेलम्बु र मेलम्चीमा पु¥याएको क्षति अकल्पनीय र भयावह भएको पाएको बताउँदैं क्षतिमा दुःख व्यक्त गर्नुभयो । उहाँले नेता बस्नेतमार्फत ३ लाख ५१ हजार रुपैंया गाउँपालिकालाई सहयोग गरेको जानकारी दिँदैं आवश्यक परे थप सहयोग गर्ने प्रतिवद्धता व्यक्त गर्नुभयो ।
कार्यपालिका सदस्य लक्ष्मी सुनारले कांग्रेसको सहयोगले बाढी पिडितको घाउमा थोरै भएपनि मल्हम लगाउने कार्य भएको बताउँदैं सहयोगको लागि धन्यवाद दिनुभयो । उहाँले बाढीले गाउँपालिकामा अर्बौ रुपैंयाको क्षति गरेको र अबको सहयोग पुनर्निर्माण र पुनर्बासका लागि आवश्यक भएको बताउनुभयो ।
