भक्तपुर, असार ३
कोरोना भाइरसको महामारीले आक्रान्त बनाएको भारतमा दोस्रो लहरको कोरोना संक्रमणका क्रममा ७ सय ३० जना चिकित्सकको मृत्यु भएको भारतीय मेडिकल एसोसिएशन (आईएमए)ले जनाएको छ । आईएमएका अनुसार ठूलो संख्यामा अन्य स्वास्थ्यकर्मी प्रभावित भएका छन् ।
राजधानी दिल्लीमा १०९ जना चिकित्सकको मृत्यु भएको आईएमएले बताए । कोरोनाको दोस्रो लहरमा सबैभन्दा धेरै बिहारमा १ सय १५ जना डाक्टरको मृत्यु भएको छ । सार्वजनिक तथ्यांकअनुसार उत्तर प्रदेशमा ७९, पश्चिम बंगालमा ६२, राजस्थानमा ४३, झारखण्डमा ३९ तथा आन्ध्र प्रदेशमा ३८ डाक्टरको मृत्यु भएको छ ।
यसैबीच पछिल्लो २४ घण्टामा भारतमा ६७ हजार २ सय ९४ जनामा कोरोना संक्रमण पुष्टि भएको छ । पछिल्ला केही दिनयता लगातार संक्रमितको संख्या घटिरहेको भारतमा पछिल्लो २४ घण्टामा फेरि संक्रमितको संख्या बढेको हो । यस्तै पछिल्लो २४ घण्टामा भारतमा १४ सय ७० जनाको मृत्यु भएको छ ।
