भक्तपुर, भदौ १९
व्याटिङमा उत्कृष्ट प्रदर्शन गरेपनि बलिङमा चुकेपछि नेपाल एसिया कप क्रिकेट २०२३ को समूह चरणबाटै बाहिरिएको छ । श्रीलंकाको पल्लेकेलेमा सोमवार राती सम्पन्न खेलमा समूहको दोस्रो खेलमा नेपाल भारतसँग १० विकेटले पराजित हुँदैं प्रतियोगिताबाट बाहिरिएको हो । जितसँगै भारतले सुपर चारमा स्थान बनायो ।
जितका लागि २३१ रनको लक्ष्य पछ्याएको भारतले २.१ ओभरमा १७ रन बनाउँदा वर्षाको कारण खेल रोकिएको थियो । दुई घण्टा भन्दा बढी समय खेल हुन नसकेपछि खेल २३ ओभरमा झारिएको थियो । डर्क विथ लेविस नियम अनुसार भारतलाई १४५ रनको लक्ष्य निर्धारण गरिएको थियो ।
भारतले २०.१ ओभरमा कुनै विकेट नगुमाई पुरा गर्यो । भारतको जितमा रोहित शर्मा ५९ बलमा ६ चौका र ५ छक्कासहित ७४ रनमा अविजित रहे । शुभमन गिल ६२ बलमा ८ चौका र १ छक्कासहित ६७ रनमा अविजित रहे ।
नेपालले भारतीय कप्तान रोहित शर्मालाई १६ रनमा जीवनदान दिएको थियो । सातौं ओभरको पाँचौं बलमा सन्दीप लामिछानेलाई प्रहार गरेको सर्ट डिप स्क्वायर लेगमा गुलशन झालाई छाड्न पुगेका थिए ।
त्यसअघि श्रीलंकाको पालेकेले इन्टरनेशल क्रिकेट स्टेडियममा टस हारेर पहिला ब्याटिङको निम्तो पाएको नेपाल ४८.२ ओभरमा २ सय ३० रनमा अल आउट भएको थियो । नेपालका ओपनर आसिफ शेख ९७ बलमा ८ चौकासहित सर्वाधिक ५८ रनको योगदान दिएपनि जितको लागि पर्याप्त हुन सकेन ।
अर्का ओपनर कुशल भुर्तेलले २५ बलमा ३ चौका र २ छक्कासहित ३८ रनको आक्रामक इनिङ खेलेका थिए । सोमपाल कामीले तल्लोक्रममा ५६ बलमा १ चौका र २ छक्कासहित ४८ रनको महत्वपूर्ण इनिङ खेलेका थिए ।
नेपाललाई ओपनर आसिफ शेख र कुशल भुर्तेलले पहिलो विकेटका लागि ९.५ ओभरमा ६५ रनको साझेदारी गर्दै ड्रिम सुरुवात दिलाएका थिए । तर त्यो सुरुवातलाई अन्य ब्याटरले निरन्तरता नदिदा विशाल योगफल बनाउन चुकेको थियो ।
तीव्र गतिका बलर शार्दुल ठाकुरको बलमा कुशल एज लाग्दै आउट हुन पुगेका थिए । स्पिनर रविन्द्र जडेजाको १६ औं ओभरको अन्तिम बलमा भीम सार्की इनसाइड एज लाग्दै ७ रनमा बोल्ड आउट हुन पुगे । स्पिनर रविन्द्र जडेजाको २० औं ओभरको अन्तिम बलमा रोहित पौडेल एज लागेर रोहित शर्माबाट क्याच आउट हुन पुगे ।
जडेजाको २२ औं ओभरको पाँचौं बलमा कुशल मल्ल ठूलो सट खेल्ने धुनमा मिडअफमा २ रनमा क्याच आउट भएका थिए । कुशल मल्ल आउट हुँदा नेपाल १०१–४ को अवस्थामा पुगेको थियो ।
आसिफ तीव्र गतिका बलर मोहम्मद शिराजको ३० औं ओभरको पाँचौं बलमा टप एज लागेको बल कोहलीले सर्ट कभरमा एक हातले क्याच लिन पुगे । गुलशन झा शिराजको बलमा २३ रनमा कट बिहाइन्ड हुन पुगे । गुलशनले ३५ बलमा ३ चौका प्रहार गरे ।
३१.५ ओभरमा १४४–६ को अवस्थामा पुगेको नेपाललाई सातौं विकेटका लागि सोमपाल कामी र दीपेन्द्रसिंह ऐरीले ५० रनको साझेदारी गर्दै २ सय रनको आंकडा पार गराएका थिए ।
दीपेन्द्र २५ बलमा ३ चौकासहित २९ रनमा हार्दिक पान्ड्याको बलमा एलबीडब्लू आउट भए । सन्दीप लामिछाने ९ रनमा रन आउट भए । करण केसी २ रनमा नटआउट रहे ।
भारतको जितमा रविन्द्र जडेजाले १० ओभरमा ४० रन खर्चेर ३ विकेट लिए । मोहम्मद शिराजले ९.२ ओभरमा १ मेडनसहित ६१ रन खर्चेर ३ विकेट लिए । शार्दुल ठाकुर, हार्दिक पान्ड्या र मोहम्मद शामीले एक एक विकेट लिए । वर्षाको कारण लगातार खेल प्रभावित बनेको थियो ।
खेल हारेपनि मन जित्न सफल
एसिया कप क्रिकेटमा नेपालले सोमबार बलियो टोली भारतसँग १० विकेटले खेल हारे पनि मन भने जित्न सफल भएको छ । विशेषगरी भारतजस्तो बलियो टोलीसँग डटेर व्याटिङ गर्नु नेपाली टोलीको उत्कृष्ट पक्ष थियो । मोहम्मद शामी, मोहम्मद सिराज र हार्दिक पाण्डे लगायतका विश्व स्तरका भारतीय बलरहरुलाई नयाँ ब्याट्सम्यानहरुले जसरी सामना गरे, त्यो तारिफ योग्य छ ।
टस जितेका भारतका कप्तान रोहित शर्माले नेपाललाई ब्याटिङको निम्तो दिए । अनि फस्ट बलरद्वय मोहम्मद सामी र मोहम्मद सिराजलाई एक अर्को इण्डबाट बलिङ गराए । त्यसका बाबजुद नेपालका ओपनयद्वय कुशल भुर्तेल र आशिफ शेखले राम्रो सुरुवात दिलाए । दुबैले सम्हालिएर ब्याटिङ गरे, पाएको मौकालाई सदुपयोग गर्दै बाउन्ड्री पनि मारे ।
भारतलाई पहिलो विकेट लिन पावर प्लेको अन्तिम दोस्रो बल कुर्नु परेको थियो । चार–चार ओभर बलिङ गर्दा पनि सामी र सिराजले विकेट लिन नसकेपछि भारतीय कप्तानले नवौं ओभरमा हार्दिक पाण्डेयलाई बल थमाएका थिए । उनलाई पनि दुबैले एकएक बाउन्डी हाने ।
दशौं ओभरमा आएका शार्दुल ठाकुरलाई चौथो बलमा कुशलले छक्का हानेका थिए । तर अर्को बलमा विकेट लिए । २५ बलको सामना गरेका कुशलले तीन छक्का र दुई छक्काको मदतमा ३८ रन बनाए ।
तीन क्याच ड्रपले नेपाललाई फाइदा
नेपालको उत्कृष्ट प्रदर्शनमा भारतको तीन क्याच ड्रपले पनि सहयोग पुगेको थियो । पहिलो ओभरको अन्तिम बलमै भुर्तेललाई आउट गर्ने राम्रो अवसर मोहम्मद शामीले सिर्जना गरेका थिए । तर स्लिपमा श्रेयस ऐयरले ड्रप गरे ।
लगत्तै दोस्रो ओभरको पहिलो बलमै मोहम्मद सिराजले नेपालका अर्का ओपनर आसिफलाई क्याच आउट गर्ने अवसर सिर्जना गरेका थिए । फेरि क्याच ड्रप भयो । विराट कोहलीले सजिलो बल समात्न सकेनन् ।
पाँचौं ओभरको दोस्रो बलमा शामीले भुर्तेललाई आउटको अर्को अवसर सिर्जना गरे । तर विकेट किपर इसान किसानले ड्रप गर्दा बल बाउण्ड्रीमा पुग्यो ।
नेपालको दुई डिएसआर सफल
खेलमा नेपालले ५ पटक डिएसआरको सहायता लिँदैं रिभ्यु लिएका थिए । जसमा दुई पटक व्याटिङ र एक पटक बलिङमा लिएका थिए । त्यसमा दुई पटक सफल भएको थियो ।
नवौं ओभरको पहिलो बलमा अम्पायरले भुर्तेललाई एलबीडब्लू आउट दिएका थिए । नेपालले त्यसमा रिभ्यू लियो र त्यसमा सफलता हासिल ग¥यो । भुर्तेललाई आउट दिने अम्पायरको निर्णय थर्ड अम्पायरले सच्याए ।
त्यसैगरी १९ औं ओभरको अन्तिम बलमा आसिफ सेखलाई कुलदिप यादवको बलमा अम्पायर पि विल्सनले आउट दिएका थिए । त्यसमा पनि नेपालले डिएसआरको सहायताले रिभ्यु माग गरे । थर्ड अम्पायरले त्यसलाई सच्याउँदैं आसिफ आउट नभएको निर्णय दिएका थिए ।
त्यस्तै ४२ औं ओभरमा बलिङ गर्न आएका हार्दिक पान्ड्याको पहिलो बलमा अम्पायरले दिपेन्द्रसिंह आउट दिएका थिए । त्यसमा पनि नेपालले रिभ्यु लिएका थिए तर त्यसमा सफल हुन सकेन ।
नेपालले बलिङमा पनि दुई रिभ्यु लिएका थिए, तर त्यसमा सफलता पाउन सकेन । त्यसमा पनि सफलता मिलेको भए खेलको कथाले अर्कै मोड लिन सक्थ्यो ।
बलिङमा नेपालले पहिलो रिभ्यु ओपनिङ बलिङ गरेका करण केसीको तेस्रो बलमा लिएका थिए । उनको रोहित शर्मा विरुद्धको एलबिडब्लयु अपिललाई अम्पायरले अस्विकार गरेपछि नेपालले रिभ्यु लिएका थिए । त्यसमा सफलता पाउन सकेन ।
यस्तै १६ औं ओभरमा बलिङ गरिरहेका सन्दिप लामिछानेको ४ औं बलमा रोहित शर्मा विरुद्ध एलबिडब्लयु अपिलमा अम्पायरले आउट नदिएपछि नेपालले बलिङमा दोस्रो पटक रिभ्यु लिएका थिए । तर त्यसमा पनि सफल हुन सकेन । थर्ड अम्पायरले अम्पायरको निर्णय सही भएको बताए ।
