भक्तपुर, साउन २९
बंगलादेशी नागरिकलाई बन्धक बनाई फिरौती माग गर्ने समूहलाई काठमाण्डौं उपत्यका अपराध अनुसन्धान कार्यालयको प्रहरी टोलीले पक्राउ गरी आइतवार सार्वजनिक गरेको छ ।
नेपालको बाटो हुँदै वैदेशिक रोजगारीमा आकर्षक तलवसहित युरोप लगायतका देशमा पठाउने भनी नेपाल बोलाई बन्धक बनाउने र उनीहरुको परिवारसँग फिरौती रकम माग गरेको अभियोगमा सो समूहलाई पक्राउ गरिएको हो ।
सो समूहले नेपाली भूमिबाट विदेश जान नेपाल आएका बंगलादेशी नागरिकसँग प्रतिव्यक्ति १० लाख रुपियाँ फिरौती मागेको र रकम नदिए हत्या गर्नेसम्मको धम्की दिएको काठमाण्डौं उपत्यका अपराध अनुसन्धान कार्यालयका सूचना अधिकारी एसपी रविन्द्र रेग्मीले बताउनुभयो ।
पक्राउ परेकाहरुमा दुई नेपाली र ५ बंगलादेशी छन । एसपी रेग्मीका अनुसार उक्त काण्डमा संलग्न रहेको आरोपमा बंगालादेशी नागरिक अमिर हुसेन, एमडी मोसिउर, सलिम मियाँ, जहाङिर आलम, तहमिना बेगमका साथै नेपाली नागरिक सिन्धुपाल्चोककी तारा नेपाली र इलामकी रोशनी राईलाई पक्राउ गरिएको हो ।
प्रहरीले ८ जना बंगलादेशी नागरिकलाई सकुशल उद्धार गरेको छ । अपहरणमा परेका व्यक्तिहरूमध्ये कालिमाटी डोलमा रहेको मेमोरियल गेस्टहाउसबाट एमडी नाजमूल, एमडी इयासिन, इब्राहिम हुसेन र एमडी अलअमिनलाई उद्धार गरेको थियो । त्यस्तै, हरिसिद्धीको एक घरमा बन्धक बनाइराखेको अवस्थामा राजोन र फरहाद हुसैनलाई र काठमाण्डौं नक्सालमा रोशनी राईको नाममा दर्ता भइ सञ्चालनमा रहेको केटिसी व्युटी पार्लर एण्ड स्पाको नाममा दर्ता भई सञ्चालन गरिएको मसाज सेन्टरमा बन्धक बनाई राखेका सपना र रुमा अख्तरलाई उद्धार गरिएको प्रहरीले जनाएको छ ।
एजेन्टले शुरूमा उनीहरूलाई युरोपेली मुलुक पठाउने भन्दै प्रतिव्यक्ति ५ लाख टाका लिएर नेपाल पठाएको थियो । नेपाल आएपछि नेपालमा रहेका एजेन्टले उनीहरूको साथमा रहेको नगद तथा मोबाइल आफ्नो नियन्त्रणमा लिएर थप पैसा मगाउन निर्देशन दिएको पाएको एसपी रेग्मीले बताउनुभयो ।
वैदेशिक रोजगारीका लागि नेपाल आएका परिवारसँग गिरोहले थप प्रतिव्यक्ति ५० हजारदेखि १० लाख टाकासम्म मागेपछि परिवारका सदस्यले नेपालमा रहेका चिनजानका व्यक्तिलाई खबर गरेका थिए ।
एक जना बंगलादेशी नागरिकले भृकुटी मण्डपमा रहेको पर्यटक प्रहरी कार्यालयमा गएर नेपालमा आएका बंगलादेशी नागरिक अपहरणमा परेको बताएपछि सो कार्यालयले काठमाण्डौं उपत्यका अपराध अनुसन्धान कार्यालयलाई खबर गरेको थियो । उक्त खबर पाएपछि कार्यालयको प्रहरी टोलीले अपहरणकारी गिरोहको खोजीलाई तीव्र बनाएको थियो ।
अनुसन्धानका क्रममा अपहरणकारीले शेख पनिरको खातामा पैसा पठाउन निर्देशन दिएपछि बंगलादेशमा रहेका उनीहरूको परिवारले १० लाख टाका पठाएका थिए । अपहरणमा परेका परिवारले १० लाख टाका पठाएपछि पुन ः १० लाख पठाउन आग्रह गर्दै पैसा नपाए अपहरणमा परेका सबैको हत्या गर्ने धम्की दिने गरेको एसपी रेग्मीले बताउनुभयो ।
उनीहरूलाई मुलुकी अपराध संहिता २०७४ को दफा २११ र २१२ तथा संगठित अपराध निवारण ऐन २०७० बमोजिमको कसुरमा थप अनुसन्धान तथा कारबाहीका लागि आइतबार प्रहरी परिसर काठमाडौं पठाइएको एसपी रेग्मीले जानकारी दिनुभयो ।
