भक्तपुर, बैशाख ११
नेपाली कांग्रेस भक्तपुर क्षेत्र नं. १ र प्रदेश समिति १ (क)को पार्टी कार्यालय कमलविनायक दोपाटीसगंै सरेको छ । यसअघि इटापाको जय नेपाल चोकमा रहेको कार्यालय सोमवारदेखी कमलविनायक सरेको हो ।
कार्यालय स्थानान्तरणपछि आयोजित कार्यक्रममा नेपाली कांग्रेस भक्तपुरका सभापति एवम् प्रतिनिधिसभा सदस्य सांसद दुर्लभ थापाले उद्घाटन गर्दै पार्टी कार्यालय भक्तपुर क्षेत्र नं. १ का जनतालाई पायक पर्ने स्थानमा सरेकोले संगठन बिस्तारमा सहयोग पुग्ने विश्वास व्यक्त गर्नुभयो ।
उहाँले पार्टी संगठनसँगै विकास निर्माणका कार्यमा समेत सहकार्य गर्न नेता कार्यकर्ताहरुलाई निर्देशन दिँदैं जनताका वास्तबिक समस्याको पहिचान गरी पार्टीलाई जनताका जनजिविकासँग समिपमा राख्न सुझाव दिनुभयो ।
उहाँले संगठन विना विकास सम्भव नभएको बताउँदैं पार्टीका बारेमा सामाजिक सञ्जालमा अनेक टिका टिप्पणी गर्ने, पार्टीका कार्यक्रममा सक्रियता नदेखाउने र गैर जिम्मेवार भएर हिँड्नेको कुरा पार्टीले नसुन्ने चेतावनी दिनुभयो ।
“हिजो देशमा यत्रो परिवर्तन ल्याउने कांग्रेस आज त्यस्तै गैर जिम्मेवार कार्यकर्ताका कारण बदनाम भएको र कमजोर हुने अवस्था आएको छ,” उहाँले भन्नुभयो, “अब यसरी चल्दैन । त्यस्ता गैर जिम्मेवार व्यक्तिका कुरा पार्टीले सुन्नुपर्छ भन्ने छैन ।”
उहाँले हिजो जन्मेको रवि लामिछाने जस्ताले ईतिहास बोकेका, जनताको मुक्तिका लागि लडेका नेता कार्यकर्तालाई ललकारेको देख्दा र त्यसैको लहलहैमा स्वार्थ लुट्न नपाएका आफ्नै पार्टी भित्रका नेता कार्यकर्ताले गर्ने गरेको विरोधले आफु आश्चर्यमा परेको बताउदै स्वार्थका लागि र कमाउनका लागि कांग्रेसमा लागेको भए अरू पार्टीमा जान सुझाव दिनुभयो ।
उहाँले पार्टीले गरेका राम्रा कामको तारिफ र नराम्रा कामको विरोध पार्टीमा आएर गर्न सक्नुपर्ने बताउँदैं फाईदा हुँदा ठिक र नभए बेठिक भन्नेका पछाडी नलाग्न कार्यकर्तालाई आग्रह गर्नुभयो ।
कार्यक्रममा क्षेत्रिय सभापति एवं चागुनारायण नगरपालिकाका नगर प्रमुख जीवन खत्रीले कार्यकर्ता र नेताहरूका गुनासोहरू सधै सुन्ने गरेको बताउँदैं पार्टी कार्यालय जुनसुकै समय पनि खुल्ने र केही विषयमा छलफल र बहश गर्नुपर्ने भए पार्टी कार्यालयमा आउन नेता कार्यकर्ताहरुलाई आग्रह गर्नुभयो ।
उहाँले केही प्रतिक्रियावादीहरुले कांग्रेसप्रति लगाएका केही भ्रमपूर्ण आरोपलाई चिरेर अघि बढ्नुपर्ने खाँचो रहेको औंल्याउँदैं पार्टी एक र्भर अघि बढे प्रतिक्रियावादीहरु आफैं परास्त हुँदैं जाने बताउनुभयो । “सामूहिक रूपमा अगाडि बढौ । तेरो मेरो नभनी हाम्रो र हामी भनी अगाडि बढौ । आरोप प्रत्यारोपमा नलागौं,” उहाँले भन्नुभयो ।
कार्यक्रममा कांग्रेस केन्द्रीय सदस्य गंगा अवाल, प्रदेश सासद सुरेस श्रेष्ठ, क्षेत्र नम्वर २ का क्षेत्रिय सभापति भेष बहादुर कार्की, बागमती प्रदेशका पुर्व राज्यमन्त्री रजनी जोन्छे, चाँगुनारायण नगर समितिका सभापति शिवहरी के सी, जिल्ला सचिब सुशिल बस्नेतलगायताका नेता कार्यकर्ताको उपस्थिति रहेको थियो ।
