भक्तपुर, कार्तिक १
नेकपा (एकीकृत समाजवादी) का अध्यक्ष एवं पुर्वप्रधानमन्त्री माधवकुमार नेपालले सत्ता गठबन्धन कसैले भत्काउन नसक्ने बताउनुभएको छ । नेकपा एकिकृत समाजवादी भक्तपुर जिल्ला कमिटीले बुधवार गठ्ठाघरमा आयोजित शुभकामना आदानप्रदान तथा चियापान कार्यक्रम अध्यक्ष नेपालले सत्ता गठबन्धन पाँच वर्षका लागि बनेकोले कसैले चाहेर भत्काउन नसक्ने ठोकुवा गर्नुभएको हो ।
उहाँले देशलाई प्रतिगमनमा लैजान खोज्नेहरुले सत्ता गठबन्धन भत्काउन अनेक षडयन्त्र गरिरहेको बताउँदैं त्यस्तो षडयन्त्र कुनै पनि हालतमा सफल नहुने दावी गर्नुभयो ।
अध्यक्ष नेपालले नेपाली जनतालाई वंश परम्परा स्विकार्य नभएको बताउँदैं राजनीति नै गर्ने ईच्छा भए दल खालेर राजनीतिमा आउन र चुनाव लड्न पुर्वराजा ज्ञानेन्द्रलाई चुनौती दिनुभयो ।
“अस्ति भएको निर्वाचन आफैंमा जनमत संग्रह हो । जनताले सीधै पार्टीलाई विश्वास गरेका छन भन्ने देखाएको छ,” उहाँले भन्नुभयो, “आफू त्याग, तपस्या र बलिदान गरेको व्यक्ति हो र जनताको साथ छ भन्ने लाग्छ भने पार्टी खोलेर वा पुरानै पार्टीबाट चुनाव चुनावमा सामेल होउन् ।” उहाँले भक्तपुर र झापाका जनताले यसबारेमा सोच्नुपर्ने बताउनुभयो ।
नेकपा एकिकृत समाजवादी भक्तपुर अध्यक्ष श्याम बस्नेतको सभापतित्वमा सम्पन्न कार्यक्रममा पार्टीका विभिन्न तहका नेता कार्यकर्ताहरुको सहभागिता रहेको थियो ।
