भक्तपुर, माघ २४
दुई दिने नेपाल भ्रमणमा रहनुभएकी अन्तर्राष्ट्रिय विकासका लागि अमेरिकी नियोग (युएसएआइडी)का प्रशासक सामन्था पावरले मंगलवार भक्तपुरको मध्यपुर थिमि–२, सानो थिमीस्थित आदर्श माध्यामिक विद्यालयको भ्रमण गर्नुभएको छ ।
डिएमपीएसले समेत परिचित आदर्श माविको निर्माण अमेरिकी सरकारको सहयोगमा भएको थियो । पुरानो र जिर्ण भएका भवनहरुमा २०७२ सालको विनाशकारी भूकम्पले थप क्षती गरेपछि हाल उक्त विद्यालयका भवनहरु युएसएआइडीको आर्थिक सहयोगमा पुर्ननिर्माण भइरहेको छ ।
सोही परियोजना अवलोकनका लागि पावर बिहान करिव ११ बजे आदर्श मावि सानो थिमि आइपुग्नुभएको थियो । उहाँलाई विद्यालयका प्रधानाध्यापक, वडा नं. २ का वडाअध्यक्ष श्रीकृष्ण श्रेष्ठलगायतले स्वागत गर्नुभएको थियो ।
विद्यालयमा पावरले विद्यार्थीहरुसँग बास्केटबल खेल्नुका साथै केही समय अन्तरक्रिया गरेको विद्यालयका प्रधानाध्यापक रामबाबु रेग्मीले बताउनुभयो । उहाँले अन्तरक्रियामा विद्यार्थीहरुसँग विद्यालयको पठनपाठन, अतिरिक्त क्रियाकलाप, नेपालको लोकतान्त्रिक पद्धतीका बारेमा जिज्ञासा राख्नुभएको थियो ।
त्यसैगरी पावरले विद्यार्थीहरुलाई भविष्यमा के बन्ने चाहना छ भन्ने प्रश्न गर्दै विद्यालय र विद्यार्थीको राय सुझाब के छ, विद्यालयमा सुधार्नुपर्ने पक्ष के छ र सरकारसँग आफुले राख्नुपर्ने विषय केही छ की भनी जिज्ञासा समेत राख्नुभएको थियो । अन्तरक्रियामा विद्यालयका ८ जना विद्यार्थीहरु सहभागी भएको प्रधानाध्यापक रेग्मीले बताउनुभयो ।
अन्तरक्रिया पछि पत्रकार सम्मेलन गर्दै पावरले विद्यालयका भवनहरु विद्यालयलाई हस्तान्तरण भएको जानकारी दिनुभयो । उहाँले अमेरिकी सरकारले नेपाललाई निरन्तर सहयोग जारी राख्ने र दुई देशबीच आपसी भाइचाराको सम्बन्ध रही रहने प्रतिवद्धता जनाउनुभयो ।
युएसएआइडीको करिव २० करोड रुपैंयाको आर्थिक सहयोगमा आदर्श माविको ४० कोठे भवनको पुनर्निर्माण भएको प्रधानाध्यापक रेग्मीले बताउनुभयो । जसमा ८ नयाँ कोठा, ४ वटा शौचालय, एउटा हललगायत छन ।
पावर युएसएआइडीकी १९औँ प्रशासक हुन । उहाँले सन् २०२१ को मे ३ तारिखमा पदभार ग्रहण गर्नुभएको थियो । उहाँले विश्वका अग्रणी अन्तर्राष्ट्रिय विकास निकाय र यसअन्तर्गत विश्वभर रहेका १० हजारभन्दा धेरै कर्मचारीको नेतृत्व गर्दै आउनुभएको छ ।
उहाँ सन् २०१३ देखि २०१७ सम्म संयुक्त राष्ट्र सङ्घका लागि २८औँ अमेरिकी स्थायी प्रतिनिधिका रूपमा सेवारत थिइन् । प्रशासक पावर सन् २००९ देखि २०१३ सम्म अमेरिकाको राष्ट्रिय सुरक्षा परिषद्की कर्मचारी भई राष्ट्रपतिका विशेष सहायकका रूपमा र बहुपक्षीय मामिला तथा मानव अधिकारसम्बन्धी वरिष्ठ निर्देशकका रूपमा पनि कार्यरत थिइन् ।
