भक्तपुर, भाद्र १३
वर्किङ भिषामा युरोपेली मुलुक रोमानिया पठाइ दिन्छु भनी रकम ठगी गर्ने एक युवतीलाई काठमाण्डौं उपत्यका अपराध अनुसन्धान कार्यालयको प्रहरी टोलीले पक्राउ गरेको छ । पक्राउ पर्नेमा काभ्रेपलाञ्चोक नमोबुद्ध नगरपालिका वडा नं. ४ घर भई हाल भक्तपुर सूर्यविनायक नगरपालिका वडा नं. ५ सल्लाघारी बस्ने २० वर्षिया पुन माया श्रेष्ठ हुन । उनलाई कोटेश्वरबाट पक्राउ गरेको हो ।
श्रेष्ठले श्रीया सुवेदीलगायतलाई रोमानिया पठाइ दिने १७ लाख ७५ हजार ठगी गरेको काठमाण्डौं उपत्यका अपराध अनुसन्धान कार्यालयका सूचना अधिकृत प्रहरी उपरिक्षक (एसपी) कृष्णप्रसाद कोइरालाले बताउनुभयो । कोइराला अनुसार श्रेष्ठले सुवेदीलगायतसँग रोमानिया पठाई दिन्छु त्यसका लागि ६ लाख रुपैंया लाग्छ र रोमानिया पुगेपछि फुड प्याकेजिङको काममा लगाइदिन्छु, मासिक ७५ हजासम्म तलव हुन्छ भनी विश्वास दिलाई प्रलोभनमा पारी पीडितहरूबाट सत्र लाख पचहत्तर हजार रुपैयाँ लिएकी थिइन् ।
रकम लिएसँगै श्रेष्ठ सम्पर्क विहीन भएकी थिइन् । त्यसरी ठगी गरेकोले वैदेशिक रोजगार विभागबाट प्रहरी कार्यालयमा पक्राउ गरी उपस्थित गराइदिन हुन भनि पत्राचार गरेको थियो । सो सम्बन्धमा आवश्यक कारवाहीका लागि श्रेष्ठलाई पक्राउ गरी थप अनुसन्धान तथा कारवाहीको लागि वैदेशिक रोजगार विभाग बुद्धनगर पठाइएको प्रहरीले जनाएको छ ।
