भक्तपुर, माघ २७
भक्तपुर नगरपालिकाका नगरसभासद्हरुले एमसीसी सम्झौता खारेजीको माग गरेका छन । सभाअध्यक्ष एवम् नगरप्रमुख सुनिल प्रजापतिको अध्यक्षतामा बिहिवार बसेको एघारौं नगरसभा बैठकका वक्ताहरुले एमसीसी सम्झौता खारेज हुनुपर्ने माग गरेका हुन ।
सभाको विशेष समयमा बोल्नुहुँदै सभासद् राजेन्द्र माकले राष्ट्रघाती एमसीसीको विरोध गर्नुपर्नाका कारणहरुबारे प्रष्ट पारेका थिए । उहाँले एमसीसी पारित भए नेपालको बौद्धिक सम्पत्तिमा अमेरिकाको एकलौटी अधिकार रहने खतरा रहेको औंल्याउनुभयो ।
सभासद् छोरीमैंया सुजखूले नेमकिपाले नेपालको सार्वभौमसत्ता रक्षाको लागि भारतीय एकाधिकार पुँजी र अमेरिकी साम्राज्यवादको थिचोमिचोविरुद्ध जनतालाई सचेत र संगठित पार्दै आइरहेको बताउनुभयो ।
त्यस्तै सभासद् तुल्सीलक्ष्मी दुमरुले देशका शासक दल र तिनका नेताहरूको सत्ता स्वार्थका लागि विदेशी शक्तिसामू झुक्ने प्रवृत्तिले देशको सार्वभौमिकता र स्वतन्त्रतामाथि खतरा बढिरहेको बताउनुभयो ।
सभासद् पूर्णगोपाल राजचलले एमसीसीको विरोधमा नेमकिपाले सुरुदेखि आवाज उठाउँदै आइरहेको अवगत गर्दै एमसीसीको नाममा अमेरिकी अनुदान पाएका कुनै पनि देशको आर्थिक अवस्था माथि नउठेको प्रष्ट पार्नुभयो ।
सभासद् रञ्जना त्वातीले नगरका अव्यवस्थित तारहरुको व्यवस्थापन र खानेपानीको उचित व्यवस्था गर्नुपर्नेमा जोड दिनुभयो । सोही क्रममा सभासद्हरु शिवप्रसाद बाला, जितेन्द्र मुनंकर्मी, सूर्यप्रसाद श्रेष्ठ, बलराम न्हिसुतु र गोविन्द दुवालले एमसीसी संरा अमेरिकी साम्राज्यवादको हिन्द–प्रशान्त सैन्य रणनीतिको अंग भएको हुँदा तत्काल खारेज गर्नुपर्ने, नेपाल सरकारले श्रीलंकाबाट शिक्षा लिई छिटो एमसीसी सम्झौता खारेज गर्नुपर्ने, शासक दलका नेताहरूको दलाली प्रवृत्तिकै कारण नेपाललाई अवाञ्छित किसिमको दबाब दिइरहेको धारणा व्यक्त गरेका थिए ।
सभामा सभाध्यक्ष प्रजापतिले नगरसभा वैचारिक छलफल र संघर्ष गर्ने थलो भएको बताउँदें बैठकमा राष्ट्रघाती एमसीसीको विरोधमा आफ्ना विचारहरु व्यक्त गर्नुहुने सभासद्हरुलाई आफ्नो सांस्कृतिक र बौद्धिक विकासको लागि अझ थप अध्ययन अनुसन्धान गर्न प्रेरित गर्नुभयो ।
‘राजनैतिक दल आस्था र विचारको आधारमा स्थापित हुने र नेमकिपाको विचार सुरुदेखि अहिलेसम्म सही सावित भइरहेको हुँदा अहिले राजनीतिक प्रतिनिधित्वको आधारमा सानो दलको रुपमा रहे पनि कालान्तरमा यसको विचारले विजय प्राप्त गर्ने निश्चित छ,’ उहाँले भन्नुभयो । वर्तमान प्रधानमन्त्री र सत्ता गठबन्धनका माओवादी नेता पुष्पकमल दाहालले चार महिना अगाडि व्यक्त गरेको भिन्न विचारहरुमध्ये अहिले प्रम देउवाले भनेजस्तै सहमतिमा एमसीसीलाई पत्राचार गरेको प्रमाणित भएको हुँदा नेता दाहालले एमसीसीबारे जनतालाई ढाँटेको प्रमाणित भएको नगरप्रमुख प्रजापतिले बताउनुभयो ।
बैठकले आ.व. २०७८÷७९ को साउन १ गतेदेखि २०७८ माघ मसान्तसम्मको कार्यपालिका बैठकका निर्णय, विभिन्न समिति–उपसमितिको निर्णय, प्रमुख, उपप्रमुख र प्रमुख प्रशासकीय अधिकृत तहबाट भएका सम्पूर्ण निर्णयहरु, आदेश र काम कारवाही सभाबाट अनुमोदन गर्ने निर्णय सर्वसम्मतिले पारित गरेको नगरप्रमुख प्रजापतिले जानकारी दिनुभयो । नगरसभाको अर्को बैठक २०७८ फागुन ३ गते मंगलबार बस्ने गरी स्थगित भएको नगरप्रमुख प्रजापतिले बताउनुभयो ।
