भक्तपुर, माघ ४
जर्मन फुटबल क्लव बायर्न म्युनिक स्ट्राइकर रोवर्ट लेवान्डोस्कीले लगातार दोस्रो पटक फिफा वर्ष खेलाडीको उपाधी जितेका छन । स्वीट्जरल्यान्डको जुरिचमा सम्पन्न अवार्ड कार्यक्रममा पोल्याण्डका लेवान्डोस्कीले लिभरपुलका मोहमद सलाह र पेरिस सेन्ट जर्मेनका लियोनल मेसीलाई पछि पार्दै लगातार दोस्रो पटक फिफा वर्ष खेलाडी घोषित भएका हुन ।
लेवान्डोस्कीले समग्रमा ४८ अंक प्राप्त गरे । मेस्सीले ४४ तथा सलाहले ३९ अंक प्राप्त गरे । सन् २०२१ मा ३३ वर्षीय फरवार्ड लेवान्डोस्कीले ६९ गोल गरेका थिए । उनले बुन्डेसलिगा अन्तर्गत एकै सिजनको लिगमा ३४ खेलमा ४३ गोल गरेका थिए । लेवान्डोस्की सन् २०१६ पछि लगातार अवार्ड जित्ने दोस्रो खेलाडी बने । यसअघि रोनाल्डोले सन् २०१६ र २०१७ मा लगातार अवार्ड जित्न सफल भएका थिए ।
यस्तै फिफाले पुरुषतर्फ अहिलेसम्मकै सर्वाधिक गोलकर्ताको रुपमा म्यानचेस्टर युनाइटेडका क्रिस्टियानो रोनाल्डोलाई विशेष अवार्डले सम्मान गरे ।
महिलातर्फ बार्सिलोनाकी एलक्सिया पुटेलास वर्षको उत्कृष्ट खेलाडी घाषित भइन् । चेल्सीका थोमस टुचेल वर्षका उत्कृष्ट प्रशिक्षक बने । उनको नेतृत्वमा चेल्सीले दोस्रोपल्ट युरोपेली च्याम्पियन्स लिग जितेको थियो ।
सेभिल्लाका इरिक लामेलाले फिफा पुस्कास अवार्ड प्राप्त गरे । चेल्सीका इडोआर्ड मेन्डीले उत्कृष्ट गोलरक्षकको अवार्ड हात पारे । डेनमार्डको पुरुष राष्ट्रिय फुटबल टोलीले फिफा फेयर प्ले अवार्ड जित्यो ।
त्यस्तै फिफा फ्यान अवार्ड डेनमार्क र फिनल्यान्डका समर्थकले जिते । इमा हाएस वर्षका उत्कृष्ट महिला प्रशिक्षक बने । क्रिस्टिएन इन्डलेर उत्कृष्ट महिला गोलरक्षक, क्रिस्टिन सिन्क्लेरले फिफा उत्कृष्ट स्पेशल अवार्ड जिते ।
