भक्तपुर, मंसिर २१
भक्तपुर नगरपालिकाले नगरभित्रका सार्वजनिक पुस्तकालय तथा वाचनालयहरुको सुधारको लागि सुझाव पेश गर्न गठित कार्यदलले मंगलवार नगरप्रमुख सुनिल प्रजापति समक्ष प्रतिवेदन पेश गरेको छ । गत असोज १९ गते नगरप्रमुख प्रजापतिको अध्यक्षतामा बसेको बैठकले सो कार्यदल गठन गरेको थियो ।
नगरपालिकाद्वारा संचालित जनज्योति पुस्तकालयका पुस्तकालय अधिकृत भूपाल मूलको संयोजकत्वमा गठित कार्यदलले नगरभित्रका ३२ मध्ये २६ वटा पुस्तकालय र वाचनालयको स्थलगत अध्ययन तथा तथ्यांक संकलन गरी प्रतिवेदन तयार पारेको नगरप्रमुख प्रजापतिले बताउनुभयो ।
प्रतिवेदनमा पुस्तकालयहरुको सुधारको लागि नगरपालिकाले आर्थिक र भौतिक सहयोग गर्नुपर्ने, प्राथमिक चरणमा भक्तपुर नगरपालिकाबाट प्रकाशित सबै पाठ्यसामाग्री र भक्तपुर मासिक, ख्वप पौ, मजदुर र श्रमिकलगायतका पत्रिका उपलब्ध गराउनुपर्ने, पुस्तकालयमा काम गर्ने जनशक्तिलाई पुस्तकालयसम्बन्धी तालिमको व्यवस्था गर्नुपर्नेलगायत ११ वटा सुझावहरु दिएको छ ।
प्रतिवेदन ग्रहण गर्दै नगर प्रमुख प्रजापतिले सार्वजनिक पुस्तकालयले देशमा सामाजिक न्याय, सभ्यता र समानतामूलक समाज निर्माणमा महत्वपूर्ण भूमिका रहने हुँदा सबैले अपनत्व ग्रहण गर्नुपर्ने विचार व्यक्त गर्नुभयो । उहाँले पुस्तकालय नागरिकहरुमा चेतना फैलाउने मुख्य आधार भएकोले कार्यदलबाट प्राप्त सुझावका आधारमा नगरमा रहेका सार्वजनिक पुस्तकालय तथा वाचनालयहरुको स्तरोन्नति गर्न भौतिक तथा आर्थिक सहयोग गर्न सकिने कुरा बताउनुभयो ।
कार्यदलमा रविन्द्र प्रसाद कुसी, (प्रगति पुस्तकालय), दिनेश खड्गी (लेनिन पुस्तकालय), कृष्ण प्रसाद सुवाल (शहिद राजकुमार स्मृति पुस्तकालय), रामकृष्ण मूलगुठी (मंगलाछें युवा क्लब तथा पुस्तकालय) सदस्य रहेका छन ।
