भक्तपुर, असार १८
महानगरिय अपराध महाशाखाको प्रहरी टोलीले कामदार भिसामा क्यानडा पठाई दिन्छु भन्दै ठगी गरेको आरोपमा काभ्रे पाँचखाल–४ तामाघाट घर भई हाल काठमाडौंको नयाँ बानेश्वरमा बस्दै आएका २१ वर्षीय प्रजिन अधिकारीलाई पक्राउ गरेको छ । प्रहरीले उनलाई काभ्रेको बनेपा नगरपालिका–२ दाहाल गाउँबाट बिहिवार पक्राउ गरिएको महाशाखाको प्रवक्ता प्रहरी उपरिक्षक (एसपी) कृष्णप्रसाद कोइरालाले बताउनुभयो ।
अधिकारीले कामदार भिसामा क्यानडा पठाएर राम्रो कम्पनीमा काम लगाई दिन्छु भन्दै सर्लाही लालबन्दीकी यमुना बस्नेतसँग १७ लाख रुपैयाँ लिएर सम्पर्क विहीन भई फरार भएको प्रहरीको आरोप छ ।
अनुसन्धानको क्रममा अधिकारीले यमुना बस्नेतसहित अन्य व्यक्तिहरुसँग समेत गरी करिव एक करोड ५० लाख ठगी गरेको खुल्न आएको एसपी कोइरालाले बताउनुभयो । उहाँका अनुसार अधिकारीबाट ठगिनेहरु सम्पर्कमा आउने क्रम जारी रहेको छ ।
अधिकारीलाई थप अनुसन्धानका लागि महानगरिय प्रहरी परिसर काठमाण्डौं पठाएको एसपी कोइरालाले बताउनुभयो ।
