भक्तपुर, असार १३
नेपाली कांग्रेस बागमति प्रदेश संसदिय दलका उपनेता एवम् सांसद कृष्णलाल भँडेलले चाँगुनारायण नगरपालिका–९ ताथलीमा भइरहेका विकास निर्माणको अनुगमन गर्नुभएको छ ।
प्रदेश पुर्वाधार विकास कोष २०७७÷०७८ अन्तर्गत आफ्नो सिफारिशमा भइरहेका विकास निर्माणको काम गुणस्तरीय भएको÷नभएकोबारे उहाँले आइतवार अनुगमन गर्नुभएको हो ।
उहाँले ताथलीको गिरी टोल पहिरो नियन्त्रण योजना, तःख्योचास्थित नयाँ बस्तीको सडक ढलान र राउत टोल जाने सडक ढलान योजनाको अनुगमन तथा अवलोकन गर्नुभएको थियो ।
सो अवसरमा उहाँले स्थानीयसँग योजनाहरुको कामको बारेमा चासो राख्दै विकास निर्माणलाई गुणस्तरीय बनाउन स्थानीयको भूमिकाबारे स्पष्ट पार्नुभयो । उहाँले गिरी टोल पहिरो नियन्त्रण योजनाका लागि ३५ लाख रुपैयाँ, सडक ढलानका लागि क्रमशः २५ लाख र ८ लाख विनियोजन गरिएको भँडेलका स्वकीय सचिव समुद्र थापाले जानकारी दिनुभयो ।
अनुगमनमा भँडेलका साथ नेपाली कांग्रेस भक्तपुर क्षेत्र नं. १ का क्षेत्रिय सभापति जीवन खत्री, नेता शंकर गौतमलगायतको उपस्थिति रहेको थियो । अनुगमनको क्रममा सांसद भँडेलले विकास निर्माणका लागि आफु कटिवद्ध भएको बताउँदै अधुरा योजना र आवश्यक भएको ठाउँको विकासका लागि आफुले थप पहल गर्ने वचन समेत दिनुभएको थियो ।
