भक्तपुर, जेठ २४
मध्यपुर थिमि नगरपालिकाले आर्थिक अवस्था कमजोर भएका नगरबासीको निःशुल्क कोरोनाको पिसिआर परीक्षण गर्ने भएको छ । नगरपालिकाको सोमवार बसेको ५२ कार्यपालिका बैठकले नेपाल कोरिया मैत्री नगरपालिका अस्पतालमा आर्थिक अवस्था कमजोर भएका नगरबासीको निःशुल्क कोरोनाको पिसिआर परीक्षण गर्ने निर्णय गरेको हो ।
त्यसैगरी बैठकले कोभिड–१९ विरुद्धको खोप नगरपालिका आफैंले व्यवस्थापन गर्ने गरी अनुदानका लागि आवश्यक प्रक्रिया गर्न स्वास्थ्य मन्त्रालयमा स्विकृतिको लागि प्रस्ताव गर्ने निर्णय गरेको नगरपालिकाका प्रवक्ता एवम् वडा नं. २ का वडाअध्यक्ष राम थापामगरले जानकारी दिनुभयो ।
यसैगरी बैठकले नगरपालिकाको नगरसभा आगामी असार ७ गते गर्ने निर्णय गरेको प्रवक्ता थापामगरले बताउनुभयो ।
