भक्तपुर, बैशाख ३०
भक्तपुरको मध्यपुर थिमि–९, निकोसेरामा मंगलवार राती सहचालकले मादक पदार्थ सेवन गरी चलाएको बस दुर्घटना भएको छ । सल्लाघारी दुवाकोट मोडबाट पुरानो थिमि तर्फ जाँदै गरेको बा. प. ०१–००६ ख ५९९८ नम्बरको भाडाको बस निकोसेरामा राती सवा दुई बजे दुर्घटना भएको हो ।
तिब्र गतीमा गुडेको बस निकोसेराका स्थानीय सानुमाया धौबन्जारको चारतले पक्की घरमा ठोक्किएको हो । बसले धौबन्जारको घर अगाडि रहेको मन्दिरलाई पूर्णरुपमा क्षती गरेको छ भने घरको सटरमा समेत क्षती गरेको छ ।
प्रहरीले बसका सहचालक सिन्धुपाल्चोकको भोटेकोशी गाउँपालिका–२ घर भएका २० वर्षीय अनिल खत्रीलाई पक्राउ गरेको छ । प्रहरीका अनुसार राति मापसे गरेर सहचालक खत्रीले बस लिएर हिंडेका थिए । बस र चालकलाई प्रहरी वृत्त ठिमीमा राखेर अनुसन्धान अघि बढाइएको प्रहरीले बताएको छ ।
