भक्तपुर, माघ १०
गत पुस १४ गते दिउँसो भक्तपुरको सानो थिमिमा लुटिएको करिव आधा किलो सुन ल्याउने महिलाको पहिचान भएको छ । उनी काभ्रेकी भएको प्रहरीले जनाएको छ । उनी पक्राउ पर्न बाँकी भएकाले प्रहरीले ती महिलाको परिचय सार्वजनिक गर्न नमिल्ने बताएको छ ।
गत पुस १४ गते फ्लाई दुवाईको उडानबाट काठमाण्डौं आएकी ती महिलाले स्यानिटरी प्याडमा लुकाएको आधा किलो सुन सानो थिमिमा फिल्मी शैलीमा लुटिएको थियो । नक्कली प्रहरीले सक्कली प्रहरीलाई डियुटीमा राखेर उक्त सुन लुटिएको थियो ।
उक्त सुन लुटिएको विषयमा कुनै उजुरी नआएपनि प्रहरीले अनुसन्धान गरेको थियो । अनुसन्धानको क्रममा प्रहरीले तीन जनालाई पक्राउ गरेपछि सुन लुटिएको घटना सार्वजनिक भएको हो ।
अनुसन्धानको क्रममा सुन ल्याउने महिला भरिया मात्र भएको खुलेको प्रहरी स्रोतले जानकारी दिए । उनी भरिया भएता पनि सुन तस्करीको कोर टिमकै सदस्य हुनुपर्ने प्रहरीको अनुमान रहेको छ ।
“तस्करहरुले वैदेशिक रोजगारीमा रहेका नेपालीलाई प्रलोभनमा पारी १५÷२० ग्राम सुन बोकाएर पठाउने गरेपनि स्यानिटरी प्याडमा लुकाएर करिव आधा किलो सुन ल्याउनुले ती महिला सुन तस्करको कोर टिमका सदस्य हुन सक्छ,” प्रहरी स्रोतले भने ।
प्रहरीले सुन भरियासँगैं सुन धनीको पनि खोजी गरिरहेको जनाएको छ । तर तत्काललाई भरिया पक्राउ नपरेकोले सुन धनीका बारेमा जानकारी प्राप्त नभएको प्रहरी स्रोतले बताए ।
प्रहरीले उक्त सुन लुटिएको घटनामा संलग्न भएको आरोपमा पूर्व प्रहरीसहित तीन जनालाई गत पुस १९ गते पक्राउ गरेको थियो । पक्राउ पर्नेहरुमा नुवाकोटको पञ्चकन्या गाउँपालिका–१ घर भई काठमाण्डौं टोखा नगरपालिका–१ झोर बस्ने २६ वर्षीय सुजन नेपाली, सिन्धुपाल्चोकको चौतारा साँगाचोकगढी नगरपालिका–३ घर भई काठमाण्डौं गोकर्णेश्वर बस्ने ३२ वर्षीया अनिता तामाङ भनिने मिनसाङ लामा तामाङ र काभ्रेको तेमाल गाउँपालिका–१ घर भई काठमाण्डौं महानगरपालिका–६ बस्ने २२ वर्षीय लालबहादुर तामाङ रहेका छन ।
पक्राउ पर्ने मध्ये नेपाली पूर्व प्रहरी हुन । उनले तीन महिना अघि मात्र प्रहरीबाट राजीनामा दिएका थिए । राजीनामा अघि प्रहरी वृत्त महाराजगञ्जमा कार्यरत नेपालीले प्रहरीको सिआइवी भएको नक्कली परिचयपत्र खेखाएर सानो थिमि प्रहरी प्रभागमा कार्यरत प्रहरी प्रयोग गरेर सुन ल्याउने महिला चढेको ट्याक्सी रोक्न लगाएर सुन लुटेका थिए ।
उक्त घटनाका मूख्य योजनाकारहरु पनि अझै फरार छन । उनीहरूविरुद्ध जिल्ला प्रहरी परिसर भक्तपुरले अनुसन्धान गरिरहेको छ । परिसर भक्तपुरका एसपी माधवप्रसाद बुढाथोकीले उनीहरूविरुद्ध ठगी, संगठित अपराध र भन्सार छली लगायतका कसुरमा अनुसन्धान भइरहेको बताउनुभयो ।
