भक्तपुर, माघ ५
भक्तपुरको चाँगुनारायण नगरपालिकाले खानेपानी गुणस्तरको परीक्षण शुल्क निर्धारण गरेको छ । भक्तपुर जिल्लामै पहिलोपटक खानेपानी गुणस्तर मिनी ल्याब शुरु गरेको नगरपालिकाले ‘खानेपानी गुणस्तर अनुगमन तथा गुणस्तर परीक्षण प्रयोगशाला सञ्चालन कार्यविधि–२०८१, स्विकृत गरी खानेपानी गुणस्तर परीक्षणको शुल्क निर्धारण गरेको हो ।
नगरपालिकाले सामुदायिक विद्यालयहरु, नगर अस्पताल र सरकारी स्वास्थ्य संस्थाहरु, नगरपालिका अन्तर्गतको वडा कार्यालय र अन्य मातहतका कार्यालयहरु र विपन्न नागरिकका लागि खानेपानी परीक्षण निःशुल्क गर्दै अन्य व्यक्ति र निकायलाई शुल्क निर्धारण गरेको हो ।
यस्तै नगरपालिकाकाले नगरभित्रका घरधुरीहरुका लागि पानी परीक्षण शुल्क प्रतिपटक ३ सय रुपैंया तोकेको छ । संस्थागत विद्यालय तथा मन्टेश्वरीका लागि प्रतिपटक .६ सय ५०, संस्थागत अस्पताल र स्वास्थ्य संस्था तथा अन्य संघसंस्थाहरु, खानेपानी तथा सरसफाइ उपभोक्ता समितिहरु, होटल, जार तथा बोतलको पानी उत्पादन गर्ने कम्पनी तथा अन्य कम्पनीहरु, नगरपालिका क्षेत्र बाहिरका घरधुरीहरुका लागि प्रतिपटक एक हजार २ सय ५० रुपैयाँ निर्धारण गरिएको छ ।
चाँगुनारायण नगरपालिकाको प्रमुख प्रशासकीय भवनमा शुरु गरिएको प्रयोगशालामा राष्ट्रिय खानेपानी गुणस्तर मापदण्ड–२०७९ मा उल्लेखित २७ वटा मध्ये धमिलोपन, हाइड्रोजन विभव, विद्युतीय संवाहकता, फलाम, क्लोराइड, अमोनिया, नाइट्रेट, सल्फेट, आर्सेनिक, क्लोरिन अवशेष, कुल कडापन, इकोली, कुल कोलिफम जस्ता आधारभूत पारामितिहरु परिक्षण गर्न सकिनेछ ।
नगरपालिकामा सञ्चालित सुरक्षित पानी र उत्थानशील नगरपालिका (सर्वोच) परियोजनासँगको साझेदारीमा खानेपानी गुणस्तर परीक्षण मिनी प्रयोगशाला शुरु गरिएको नगर प्रमुख जीवन खत्रीले बताउनुभयो । उहाँले नगरवासीलाई स्वच्छ खानेपानीको बन्दोबस्त गर्नका लागि खानेपानी गुणस्तर परीक्षण गर्न र गराउनका लागि शुरु गरेको मिनी ल्याबमा पानीको गुणस्तर परीक्षणका लागि शुल्क निर्धारण गरिएको बताउनुभयो ।
चाँगुनारायण नगरपालिकाले नेदरल्याण्डको डोपर संस्थासँगको समन्वय र लागत साझेदारीमा विभिन्न संस्थाको सहयोगमा ल्याब सञ्चालनमा ल्याइएको हो । यससँगै भक्तपुर जिल्लामा रहेको नगरपालिकाहरु मध्ये चाँगुनारायण खानेपानी गुणस्तर परीक्षण प्रयोगशाला सञ्चालनमा ल्याउने पहिलो नगरपालिका बनेको छ । काठमाण्डौं उपत्यकाको खानेपानी गुणस्तर परीक्षण प्रयोगशाला सञ्चालन गर्ने चाँगुनारायण तेस्रो नगरपालिका भएको छ । यसअघि गोदावरी र महालक्ष्मी नगरपालिकाले यस्तो प्रयोगशाला शुरु गरेको थियो ।
