भक्तपुर, माघ ४
मध्यपुर थिमि नगरपालिकाले चालु आर्थिक वर्ष २०८१÷०८२ को पहिलो ६ महिनामा १४ करोड रुपैंया भन्दा बढी आन्तरिक स्रोतबाट राजश्व संकलन गरेको छ । चालु आ.व.को साउन १ गतेदेखी गत पुस २० गतेसम्म मध्यपुर थिमि नगरपालिकाले १४ करोड २८ लाख १९ हजार ६ सय ९० रुपैंया आन्तरिक स्रोतबाट राजश्व संकलन गरेको हो ।
यो नगरपालिकाको कुल वार्षिक लक्ष्यको ३९ दशमलव ३६ प्रतिशत हो । मध्यपुर थिमि नगरपालिकाले चालु आ.व.मा ३६ करोड २८ लाख ७ हजार आन्तरिक स्रोतबाट राजश्व संकलन गर्ने लक्ष्य राखेको थियो ।
गत आर्थिक वर्ष २०८०÷०८१ को तुलनामा यसवर्ष घर नक्सा पास कम हुनुले लक्ष्य अनुरुप राजश्व संकलन हुन नसकेको मध्यपुर थिमि नगरपालिकाका उपप्रमुख विजयकृष्ण श्रेष्ठले जानकारी दिनुभयो । गतवर्ष मध्यपुर थिमि नगरपालिकाले घर नक्साको अभिलेखीकरण र नियमित खुलाएको थियो । सोही कारण नक्सापास दस्तुर र जरिवाना वापत उल्लेख्य राजस्व संकलन भएको उपप्रमुख श्रेष्ठले बताउनुभयो ।
यसवर्ष घर नक्सा पासमा राजश्व संकलनमा कमी आएपनि व्यवसाय कर, घरबहाल कर र विज्ञापन कर शिर्षकमा राजश्व संकलन बृद्धि भएको उपप्रमुख श्रेष्ठले बताउनुभयो । उहाँका अनुसार व्यवसाय कर, घरबहाल कर र विज्ञापन कर शिर्षकमा गत आ.व.२०८०÷०८१ को तुलनामा २ करोड ५२ लाख ८९ हजार ८ सय ८८ रुपैंया बढी राजश्व संकलन भएको छ ।
मध्यपुर थिमि नगरपालिकाले चालु आ.व.को पहिलो ६ महिनामा सबै भन्दा धेरै असोजमा ३ करोड ६० लाख ५६ हजार ३७ रुपैंया आन्तरिक आम्दानी गरेको छ । यस्तै साउनमा ३ करोड २७ लाख ८५ हजार ४ सय ५२ रुपैंया राजश्व संकलन गरेको थियो भने भाद्रमा २ करोड ४३ लाख ५३ हजार ४ सय ७३ रुपैंया आन्तरिक आम्दानी गरेको थियो ।
यसैगरी कार्तिकमा १ करोड ९८ लाख १२ हजार ३ सय ६६ रुपैंया, मंसिरमा २ करोड ८ लाख १६ हजार एक सय ७४ रुपैंया आम्दानी गरेको मध्यपुर थिमिले पुसमा सबैभन्दा कम ९४ लाख १७ हजार ९ सय ८१ रुपैंया मात्र राजश्व संकलन गरेको उपप्रमुख श्रेष्ठले जानकारी दिनुभयो ।
