भक्तपुर, पुस ६
पहिलो संस्करणको नेपाल प्रिमियर लिग (एनपिएल)को उपाधि जनकपुर बोल्ट्ले जितेको छ । किर्तिपुरस्थित टियु मैदानमा शनिवार सम्पन्न फाइनलमा सुदुरपश्चिम रोयल्स्लाई ५ विकेटले पराजित गर्दै जनकपुरले उपाधि जितेको हो ।
उपाधिका लागि सुदुरपश्चिमले दिएको १ सय ८५ रनको लक्ष्य जनकपुरले १९.२ ओभरमा ५ विकेट गुमाएर पूरा गर्दै उपाधि जितेको हो । जनकपुरलाई उपाधि दिलाउन ओपनर लाहिरु मिलन्थाले आक्रामक अर्धशतक बनाए । उनले सर्वाधिक ८७ रन जोडे ।
मिलान्थाले ४९ बलमा ९ चौका र ४ छक्का प्रहार गरे । लिगको दोस्रो अर्धशतक उनले ३१ बलमा पूरा गरे । १२औं ओभरको पहिलो बलमा मिलन्थाले जीवनदान पाएका थिए । उनलाई कप्तान दीपेन्द्रसिंह ऐरीले आफ्नै बलमा क्याच छोडेका थिए ।
त्यो समयमा मिलान्था ६५ रन बनाएका थिए । पहिलो विकेटका लागि मिलान्था र आसिफ शेखले ४२ बलमा ७३ रनको साझेदारी गरे । आसिफले १९ बलमा ४ चौका र २ छक्काको सहयोगमा ३३ रन जोडे ।
आसिफ अलि जेबको बलमा ब्राण्डन मक्मुलनबाट समातिए । हर्ष ठाकरले २४ बलमा २ छक्काका साथ नट आउट ३० रन जोडे । मोहम्मद मोहसिन ८ बलमा ९ रन बनाउँदै इशान पाण्डेको बलमा बोल्ड भए ।
जेम्स निशम ४ रन जोड्दै कप्तान दीपेन्द्रको बलमा बोल्ड आउट भए । सुदूरपश्चिमका लागि दीपेन्द्र, स्कट कुग्गेलेइन, जेब र इशान पाण्डेले समान १ विकेट लिए ।
त्यसअघि टस जितेर पहिले ब्याटिङ गरेको सुदूरपश्चिमले निर्धारित २० ओभरमा ९ विकेट गुमाएर १ सय ८४ रनको बलियो योगफल तयार गरेको थियो । सुदूरपश्चिमका जेबले सर्वाधिक ६९ रन जोडे । उनले ४३ बलमा ८ चौका र २ छक्का प्रहार गरे । जेबले एनपिएलमा आफ्नो दोस्रो अर्धशतक ३३ बलमा पूरा गरे ।
१२औं ओभरको पहिलो बलमा जेबले जीवनदान पाएका थिए । किशोर महतोको बलमा जेबको क्याच शेर मल्लले ड्रप गरेका थिए । त्यो समयमा जेबले ३९ बलमा ६४ रन जोडेका थिए । त्यसै ओभरको अन्तिम बलमा जेब बाउन्ड्री नजिकै ललितबाट समातिए ।
पहिलो विकेटका लागि जेबले अर्का ओपनर विनोद भण्डारीसँग मिलेर ७२ बलमा १ सय १७ रनको महत्वपूर्ण साझेदारी गरे । जेब आउट भएको अर्को ओभरमा विनोद पनि आउट भए । विनोदले ३१ बलमा १ चौका र ३ छक्काको सहयोगमा ४१ रन बनाए ।
हर्मित सिंह ८ बलमा १ छक्काको सहयोगमा १४ रन बनाउँदै आउट भए । उनी मोहम्मद मोहसिनको बलमा हेमन्त धामीबाट समातिए । ब्रेण्डन मक्मुलन १२ बलमा १ छक्काको सहयोगमा १४ रन बनाउँदै जेम्स निशमको बलमा बोल्ड आउट भए । १ सय १७ रन बनाउँदा कुनै विकेट नगुमाएको सुदूरपश्चिमले त्यसपछि निरन्तर विकेट गुमायो । उसले पछिल्लो ९ विकेट गुमाउँदा ६७ रन मात्र जोड्न सक्यो । कप्तान दीपेन्द्र ९, आरिफ शेख १ तथा स्कट कुग्गेलेइन ८ रनमा आउट भए ।
जनकपुरका लागि किशोर महतो र मोहम्मद मोहसिनले समान ३, ललित र जेम्स निशमले समान १ विकेट लिए ।
उपाधिसँगै जनकपुरले आकर्षक ट्रफी सहित १ करोड १० लाख रुपैयाँ नगद पुरस्कार प्राप्त गरे भने उपविजेता बनेको सुदूरपश्चिमले ५१ लाख रुपैयाँ नगद पुरस्कार पाए । एनपिएलमा तेस्रो भएको कर्णाली याक्सले २५ लाख र चौथो चितवन राइनोजले १५ लाख रुपैयाँ प्राप्त गरे ।
जनकपुरले लिग चरण र पहिलो क्वालिफायरमा भएको हारको बदला लिँदैं उपाधि जितेको हो । जनकपुर सुदुरपश्चिमसँग लिन चरणमा ७२ रन र क्वालिफायरमा ८ विकेटले पराजित भएको थियो । लिगमा पहिले व्याटिङरेको सुदुरपश्चिमले १२३ रन बनाएको थियो भने जवाफमा जनकपुर १२.१ ओभरमा ५१ रन बनाउँदैं अलआउट भएको थियो ।
यस्तै फाइनल प्रवेशका लागि भएको पहिलो क्वालिफायरमा जनकपुरले पहिले व्याटिङ गर्दै ९ विकेटको क्षतिमा १३९ रन बनाएको थियो । जवाफमा सुदुरपश्चिमले १८.३ ओभरमा २ विकेट गुमाउँदैं १४१ रन बनाई खेल ८ विकेटले जित्दै फाइनल प्रवेश गरेको थियो । जनकपुरले त्यसपछि दोस्रो क्यालिफायरमा कर्णाली याक्सलाई रोमाञ्चक प्रतिष्पर्धामा २ विकेटले पराजित गर्दै फाइनल प्रवेश गरेको थियो ।
