भक्तपुर, पुस ६
पर्यटक पथ प्रदर्शक (टुरिष्ट गाईड)हरुले शनिवार मध्यपुर थिमिका सम्पदा एवम् ऐतिहासिक बस्तीहरुको अवलोकन गरेका छन । यही पौष १२, १३ र १४ गते हुने मध्यपुर महोत्सवको प्रचार प्रसार एवम् मध्यपुर थिमिमा पर्यटन उद्योगको विकासका लागि आयोजित सम्पदा पदयात्रा कार्यक्रम अन्तर्गत पर्यटक पथ प्रदर्शकहरुले मध्यपुरका सम्पदा अवलोकन गरेका हुन ।
मध्यपुर थिमिमा पर्यटन उद्योगको विकास गरी स्थानीय कला सँस्कृति, सम्पदा, रहनसहन एवम् जीवनशैली, परम्परागत पेशा व्यवसायलाई पर्यटनसँग जोडेर स्थानीयको आय आर्जन बृद्धि गरी समृद्ध मध्यपुर निर्माण गर्ने उद्देश्यले मध्यपुर थिमि नगरपालिकाले यही पौष १२, १३ र १४ गते तीन दिन मध्यपुर महोत्सव–२०८१ आयोजना गर्दैछ ।
सोही महोत्सवका दौरान नगरपालिकाले टुरिष्ट गाइड एशोसियसन नेपाल (टुरगान)सँग सहकार्य गरी पर्यटक पथ प्रदर्शकहरुलाई मध्यपुर थिमिको अवलोकन गराईएको हो ।
स्थानीय शंखधर चोकस्थित ऐतिहासिक भाफल्चाबाट शुरु भएको पदयात्रा बालकुमारी लोकश्वर, लायकू, दिगु बहाः, चपाचोको पोटरी क्षेत्र, न्यागा, नगदेशको लाछिस्थित लुँझ्या (सुनको झ्याल), बोदेको लाछि, पाँचो, भाँगु र तिगनी निलबाराहीमा पुगेर समापन भएको थियो ।
पदयात्राको शुरुवात गर्दै मध्यपुर थिमि नगरपालिकाका प्रमुख एवम् मध्यपुर महोत्सव मूल समारोह समितिका संयोजक सुरेन्द्र श्रेष्ठले मध्यपुर लिच्छवीकालिन बस्ती एवम् सम्पदाहरुले भरिपूर्ण शहर भइकन पनि पयर्टन उद्योग फस्टाउन नसकिरहेको अवस्थामा यहाँका कला सँस्कृति एवम् सम्पदाहरुको प्रचार प्रसार गरी पर्यटनको विकास गर्न मध्यपुर महोत्सव आयोजना गरिएको बताउनुभयो ।
उहाँले पयर्टक पथ प्रदर्शकहरुको आजको पदयात्राले आगामी दिनमा मध्यपुरमा विदेशी पर्यटन भित्र्याउने ढोका खुल्ने विश्वास व्यक्त गर्नुभयो ।
नगरपालिकाका उपप्रमुख विजयकृष्ण श्रेष्ठले मध्यपुर पनि एउटा पर्यटकिय गन्तव्य स्थल भएको चर्चा गर्दै मध्यपुरमा विदेशी पर्यटन ल्याउन सहयोग गर्न पर्यटक पथ प्रदर्शकहरुलाई आग्रह गर्नुभयो ।
पदयात्राका क्रममा मध्यपुर थिमिका संस्कृतिविदहरु ई. राजेन्द्र श्रेष्ठ, धर्मसुन्दर बज्राचार्य, प्रदिप श्रेष्ठलगायतले मध्यपुर थिमिका सम्पदाहरुको ऐतिहासिक, धार्मिक एवम् पौराणिक महत्वका बारेमा जानकारी गराउनुभएको थियो ।
पदयात्रामा करिव एक सय जना पर्यटक पथ प्रदर्शकहरुको सहभागिता रहेको मध्यपुर थिमि नगरपालिका आर्थिक विकास महाशाखा प्रमुख एवम् महोत्सव सञ्चालक समितिका सदस्य सचिव तुलसीभक्त तकोले जानकारी दिनुभयो ।
