भक्तपुर, पुस १
नेपाल प्रिमियर लिग (एनपिएल) को प्लेअफ समीकरण पूरा भएको छ । एनपिएलको लिग चरणका खेल सोमवार सकिएसँगै प्लेअफ समीकरण पनि पूरा भएको हो ।
लिग चरणको समाप्तिमा सुदूरपश्चिम रोयल्स शीर्षमा, जनकपुर बोल्ट्स दोस्रोमा , चितवन राइनोज तेस्रो र कर्णाली याक्स चौथोमा रहेर प्लेअफमा छनोट भएका छन ।
सुदूरपश्चिमले लिगका ७ खेलबाट १२ अंक जोडेको छ । जनकपुरले लिगमा ५ जित, दुई हार व्यहोर्दै १० अंक जोड्यो भने चितवन, कर्णाली र काठमाण्डौं गुर्खाजको समान ८ अंक रहेको छ । समान ८ अंक भएपनि नेटरनरेटको आधारमा चितवन र कर्णाली प्लेअफमा पुगेको हो ।
लिगमा समान ४ अंक जोडेको विराटनगर किंग्स र पोखरा एभेन्जर्स, २ अंक जोडेको लुम्विनी लायन्स् प्लेअफबाट बाहिरिएका छन ।
एनपिएलको प्लेअफको पहिलो खेल बुधवार बिहान ९ बजे तेस्रो स्थानको चितवन र चौथो स्थानको कर्णालीबीच हुनेछ । त्यो इलिमिनेटर खेल हुनेछ ।
त्यस खेलको विजेता टोलीले फाइनल प्रवेशका लागि दोस्रो क्वालिफायरमा प्रवेश पाउनेछ । पराजित हुने टोली एनपिएलबाट बाहिरिने छ ।
बुधवार दिउँसो १ बजे प्लेअफको दोस्रो खेल हुनेछ । प्लेअफको दोस्रो खेल पहिलो क्वालिफायर खेल हुनेछ । त्यसमा शीर्ष स्थानको सुदूरपश्चिम र दोस्रोको जनकपुर बोल्ट्सबीच प्रतिस्पर्धा हुनेछ ।
पहिलो क्वालिफायर खेलको विजेता टोलीले स्वतः फाइनल पुग्नेछ । त्यसमा पराजित हुने टोलीले फाइनल प्रवेशका लागि अर्को मौका पाउनेछ । पहिलो क्वालिफायरको पराजित टोली र इलिमिनेटरको विजेताबीच दोस्रो क्वालिफायर खेल हुनेछ । त्यसको विजेता फाइनल पुग्ने दोस्रो टोली हुनेछ । पहिलो संस्करणको एनपिएलको फाइनल शनिवार दिउँसो १२ बजे सुरु हुनेछ ।
