भक्तपुर, मंसिर २४
चाँगुनारायण नगरपालिका र नेपाल रेडक्रस सोसाइटी भक्तपुर जिल्ला शाखाको साझेदारीमा सञ्चालित स्वास्थ्य बुढ्यौलीका लागि सहारा परियोजना अन्तर्गत वडा नम्बर ७ को बागेश्वरी स्वास्थ्य चौकीमा निःशुल्क ज्येष्ठ नागरिक स्वास्थ्य शिविरको आयोजना गरिएको छ । वडा कार्यालय तथा ज्येष्ठ नागरिक मिलन चौतारी वडा नं ७ को समन्वयमा सञ्चालित स्वास्थ्य शिविरमा १६१ जना ज्येष्ठ नागरिकहरुलाई निःशुल्क स्वास्थ्य जाँच संगै औषधि वितरण गरिएको हो ।
निःशुल्क स्वास्थ्य शिविरमा भक्तपुर अस्पतालका हाड जोर्नी विशेषज्ञ, स्त्री रोग विशेषज्ञ, नाक कान घाँटी विशेषज्ञ र फिजिशियन चिकित्सक, ख्वप तिलगंगा आँखा अस्पतालका आँखा जाँच गर्ने टोली र नगर अस्पतालका चिकित्सक टोलीद्धारा ज्येष्ठ नागरिकहरुको स्वास्थ्य जाँच गरिएको थियो । शिविरमा १४३ जना ज्येष्ठ नागरिकहरुको मधुमेह (सुगर) जाँच पनि गरिएको थियो ।
शिविरबाट पहिचान भएका ७ जना मोतिया विन्दुका बिरामीलाई शल्यक्रिया गराइनेछ भने अन्य थप उपचार सेवा आवश्यक ज्येष्ठ नागरिकहरुको लागि स्वास्थ्य संस्थाहरुसँग आवश्यक समन्वय र सहकार्य नगरपालिकाको स्वास्थ्य शाखाले गर्ने भएको छ ।
शिविरको शुरुवात गर्दै चाँगुनारायण नगरपालिकाका नगर प्रमुख जीवन खत्रीले नगरपालिकाले नगरबासीको स्वास्थ्य सेवालाई टोलटोलमा पु¥याउने योजना अघि बढाएको बताउनुभयो । उहाँले ताथली, सुडाल, बागेश्वरी र नगरकोटका बासिन्दालाई नगर अस्पताल पुग्न असहज र अपायक परिरहेको प्रति आफू सचेत रहेको र त्यसको ब्यवस्थापनका लागि काम भइरहेको जानकारी दिनुभयो ।
नगर अस्पतालबाट प्रवाह हुने अन्य सेवाहरु ब्यवस्थित बन्दै लगेको र सेवाविस्तार भएकाले नगर अस्पतालमा गएर सेवालिन आग्रह पनि गर्नुभयो ।
उहाँले नगरपालिकाले नेपाल रेडक्रस सोसाइटी रक्तसंचार सेवा भक्तपुरसँग सहकार्य गरी नगरबासी विरामीलाई निःशुल्क रगत तथा नगर अस्पतालबाट निःशुल्क अक्सिजनको व्यवस्थापन गरेका जानकारी दिनुहुदै नगरबासी ज्येष्ठ नागरिकहरुलाई स्वस्थ्य र सक्रिय बनाउने कार्यमा नगरपालिकाले सदैव प्राथमिकता दिई कार्य गर्दै आइरहेको बताउनुभयो ।
नेपाल रेडक्रस सोसाईटी भक्तपुर शाखाका सभापति परशुराम पाण्डेले स्थानीय तहहरुमध्ये ज्येष्ठ नागरिकहरुलाई प्राथमिकतामा राखी ज्येष्ठ नागरिकहरुको लागि स्वस्थ्य बुढ्यौली (सहारा) परियोजना सञ्चालन गर्ने चाँगुनारायण भक्तपुरको एक मात्र पालिका भएको बताउनुभयो ।
उहाँले नेपाल रेडक्रस सोसाइटी भक्तपुर शाखाले समुदायसँग हातेमालो गर्दै मानवीय सेवाका गतिविधि तथा कार्यहरु गर्दै आएको बताउनुभयो । सहारा परियोजना अन्र्तगत बाँकी वडाहरुमा पनि यस प्रकारको शिविर क्रमश सञ्चालन गर्दै लगिने कुरा सभापति पाण्डेले जानकारी दिनुभयो ।
चाँगुनारायण नगरपालिका वडा नं ७ का अध्यक्ष श्यामकृष्ण नँयाजु श्रेष्ठले नगरपालिकाले ज्येष्ठ नागरिक समुह गठन, बाद्यबाधन सामग्रीहरु वितरण, धार्मिक भ्रमण जस्ता विविध गतिविधिहरु सञ्चालन गरिरहेको जानकारी दिनुभयो ।
चाँगुनारायण नगर अस्पतालका मे.सु डा. अर्जुन कार्कीले नगर अस्पतालका सेवाहरुका बारेमा जानकारी दिनुहुदै नगरबासीलाई नगर अस्पतालबाट सेवालिन अनुरोध गर्नुभयो ।
शिविरमा नगरपालिका अन्तर्गतका महिला स्वास्थ्य स्वयंसेवीका, स्वास्थ्य केन्द्र तथा परियोजनाका कर्मचारीहरु र नेपाल रेडक्रस सोसाइटीका स्वयंसेवकहरुले स्वंसेवकको भूमिकामा सहयोग गर्नुभएको थियो ।
