भक्तपुर, मंसिर ६
स्वास्थ्य तथा जनसंख्या मन्त्री प्रदिप पौडेलले बुधवार नेपाल रेडक्रस सोसाईटी भक्तपुरले सञ्चालन गरेको रक्तसञ्चार केन्द्रको निरीक्षण गरी केन्द्रले प्रदान गर्दै आइरहेको सेवाको बारेमा जानकारी लिनुभएको छ ।
सो अवसरमा मन्त्री पौडेललाई नेपाल रेडक्रस सोसाईटी भक्तपुर शाखाका सभापति परशुराम पाण्डेले केन्द्रले कसरी रगत सङ्कलन देखि यसको वितरणको काम गर्दै आएको छ भनी जानकारी दिनुभएको थियो । उहाँले भक्तपुर रेडक्रसले वर्षमा २४ हजार पिन्ट भन्दा बढी रगत सङ्कलन तथा ५२ हजार पिन्ट भन्दा बढी वितरण गर्दै आएको मन्त्री पौडेललाई जानकारी दिनुभयो ।
‘न्याय नपाए गोर्खा जानु’ भने जस्तै ‘रगत नपाए भक्तपुर जानु’ भन्ने नारा तय गरी सो नारालाई यथार्तमा परिणत हुने गरी रेडक्रस र रक्तसञ्चार केन्द्रले काम गरिरहेको सभापति पाण्डेले जानकारी गराउनुभयो । पाण्डेले रक्त संकलन तथा वितरकको रूपमा भक्तपुरको रक्तसञ्चार केन्द्र नेपालको दोस्रो ठूलो भएको पनि जानकारी दिनुभएको थियो ।
निरीक्षणपछि मन्त्री पौडेलले भक्तपुर रेडक्रसले उत्कृष्ट कार्य गरेको भन्दै आम रक्तदाताहरूको रगतलाई भक्तपुर रक्तसञ्चार केन्द्रले न्याय गरेको पाएको बताउनुभएको थियो । उहाँले संघीय सरकारको तर्फबाट मन्त्रालयमार्फत केन्द्रले आवश्यक सहयोग गर्ने प्रतिवद्धता समेत व्यक्त गर्नुभयो ।
सो अवसरमा बागमती प्रदेश सभा सदस्य सुरेश श्रेष्ठ, रेडक्रस भक्तपुरका सदस्य एवम् रक्तसञ्चार केन्द्र व्यवस्थापन समितिका संयोजक तथा चाँगुनारायण नगरपालिका वडा नं. २ का वडाअध्यक्ष सोम प्रधान, रेडक्रस भक्तपुरका मन्त्री धर्मराज थापालगायतको सहभागिता रहेको थियो ।
