भक्तपुर, मंसिर १
नेपालले पुरुष फुटबलमा १३ वर्षपछि अफगानिस्तानलाई पराजित गरेको छ । फिफा अन्तराष्ट्रिय विण्डो अन्तर्गत ताजिकिस्तानको सेन्ट्रल स्टेडियम डुसान्बेमा शनिवार सम्पन्न मैत्रीपूर्ण खेलमा नेपालले अफगानिस्तानलाई २–० गोल अन्तरले पराजित गरेको हो ।
नेपालको जितमा जिलेस्पीजंग कार्की र रोहित चन्दले एक एक गोल गरे । पहिलो हाप बराबरीमा सकिएको खेलको दोस्रो हापको शुरूआतमै जिलेस्पीजंगले गोल गर्दै नेपाललाई अग्रता दिलाए ।
खेलको ७८ औं मिनेटमा रोहितले नेपालको अग्रता दोब्बर पारे । सन् २००९ मा प्यालिस्टाइनविरुद्ध १७ वर्षकै उमेरमा राष्ट्रिय टोलीमा डेब्यु गरेका रोहितको राष्ट्रिय टोलीको लागि पहिलो गोल हो । कर्नरमा डिफेन्डरले क्लियर गरेको बललाई रोहितले पेनाल्टी क्षेत्रभित्र नियन्त्रणमा लिँदै गोल गरेका थिए ।
खेलको ८७ औं मिनेटमा कप्तान किरण चेम्जोङले उत्कृष्ट बचाउ गर्दै खेललाई २–० को स्थितिमा राखे । उनले ६ यार्ड बक्स नजिकबाट आएको भलीलाई डाइभ दिँदै विफल पारेका थिए । नेपालले अग्रता लिएपछि रक्षात्मक रुपमा बलियो प्रदर्शन गरेको थियो ।
नेपालले अफगानिस्तानविरुद्ध पछिल्लो जित भरत खवासको गोलमा हात पारेको थियो । एएफसी च्यालेन्ज कप २०१२ छनोटमा भरतको गोलमा नेपालले दशरथ रंगशालामा १–० (अप्रिल, २०११)को जित निकालेको थियो ।
त्यसपछि नेपालले अफगानिस्तानविरुद्ध दुई खेल मध्ये दुवैमा नेपाल पराजित भएको थियो । ती दुवै हार साफको सेमिफाइनलमा भएको थियो । पहिलो नयाँ दिल्लीमा सन् २०११ र काठमाडौं २०१३ को भेटमा अफगानिस्तानले बाजी मारेको थियो ।
काठमाडौंमा भएको अन्तिम भेटमा रोहितले दुईपल्ट पेनाल्टी प्रहार गरे पनि गोल गर्न नसक्दा नेपाल पराजित हुन पुगेको थियो । तर, यसपल्ट उनले नै नेपालको जर्सीमा गोल गर्दै नेपाललाई सहज जित दिलाए ।
नेपालले कार्तिक २८ गते बुधबार भएको खेलमा फिफा वरीयतामा ५१ स्थानमाथिको घरेलु टिम ताजिकिस्तानविरुद्ध ४–० को हार बेहोरेको थियो । अफगानिस्तानले मंगलबार ताजिकिस्तानसँग खेल्ने छ ।
नेपालले पछिल्लो दुई फिफा विन्डोमा खेल्न नपाएपछि यसपटक भने खेल्न पाएको थियो । अन्तरिम प्रशिक्षक नवीन न्यौपानेले पनि दोस्रो खेलमै जितको स्वाद चाखेका छन् ।
अब टोलीले मार्च २०२५ मा एसियन कप छनोटको तेस्रो चरण खेल्नेछ । यसका लागि समूह विभाजन डिसेम्बर ९, २०२४ मा हुनेछ ।
