भक्तपुर, मंसिर १
मध्यपुर थिमि नगरपालिकाले गठन गरेको युवा क्लव सञ्जालले शनिवारबाट साप्ताहिक मठमन्दिर सरसफाई अभियान शुरु गरेको छ । मध्यपुर थिमि नगरपालिकाले यही पौष १२, १३ र १४ गते आयोजना गर्ने मध्यपुर महोत्सवलाई लक्षित गरी युवा सञ्जालले सरसफाई अभियान शुरु गरेको हो ।
अभियानको बालकुमारी मन्दिरमा शुरुवात गर्दै मध्यपुर थिमि नगर प्रमुख सुरेन्द्र श्रेष्ठले युवाहरुलाई सामाजिक कार्यमा उत्प्रेरित गर्ने उद्देश्यले अभियानको शुरुवात गरेको बताउनुभयो । उहाँले युवाहरु आधुनिकताको नाममा ईन्टरनेट र मनोरञ्जनमा मात्र सिमित हुँदा सामाजिक कार्य ओझेलमा पर्न थालेको बताउँदैं नगरपालिकाले युवाहरुलाई विभिन्न गतिविधिमा संलग्न गराउने उद्देश्यले कार्य गरिरहेको जानकारी दिनुभयो ।
उहाँले आजका युवाहरु भोली स्थानीय तह र देशको नेतृत्व गर्ने वर्ग भएकाले अहिलेदेखी उनीहरुलाई सामाजिक कार्यका साथै नागरिकसँग हेलमेल हुने कार्यमा सक्रिय बनाउनु पर्नेमा जोड दिनुभयो ।
अभियान अन्तर्गत मध्यपुर महोत्सवको पूर्व तयारीका लागि युवा सञ्जाल र हरेक वडाका युवा क्लबहरुको सहभागितामा प्रत्येक शनिवार मध्यपुर थिमिका पुरातात्विक, ऐतिहासिक एवम् धार्मिक महत्वका मठमन्दिर एवम् सम्पदाहरुको सरसफाई गर्ने सञ्जालका अध्यक्ष सनिम द्धारेले बताउनुभयो । कार्यक्रममा नगर प्रहरीको पनि सहभागिता रहेको थियो ।
