भक्तपुर, कार्तिक २०
राष्ट्रव्यापी कथा प्रतियोगितामा जाजरकोटका युवा कथाकार शिवराज जोशी प्रथम हुनुभएको छ । चक्रपाणि स्मारक प्रतिष्ठानले आयोजित उक्त प्रतियोगितामा जोशीको ‘सन्तानको फोटो’ कथा प्रथम भएको हो ।
जोशीलाई प्रतिष्ठानले मंगलवार भक्तपुरको कटुञ्जेस्थित चक्रपाणि चालिसेको प्रतिमास्थलमा आयोजित कार्यक्रममा नगद ३० हजारसहित पुरस्कृत गरे ।
जोशीको कथा सन्तानको फोटोमा संसारभरि बढीरहेको बुढ्यौली, निर्जन बन्दै गएको गाउँबस्ती र बौद्धिक पलायनले जर्जर नेपालको जीवन्त कथा बोकेको प्रतिष्ठानका सदस्य सचिव एवम् कथा प्रतियोगिताका प्रधान सम्पादक रामगोपाल आशुतोषले बताउनुभयो ।
प्रतियोगितामा मनीषकुमार शर्मा ‘समित’ दोस्रो हुनुभयो । उहाँको बालमनोविज्ञानमा आधारित कथा ‘मैले नभित्राएको बुहारी’ले दोस्रो स्थान प्राप्त गरेको हो । उक्त कथामा ढिलो स्वास्थ्य उपचारका कारण गम्भिर बिरामी भएकी एक बालिकाको परम्परागत उपचार वा धामीझाँक्रीको चक्करमा मृत्यु भएको घटनालाई कथाको रुपमा प्रस्तुत गरेको छ । कथाकार समितले नगद २० हजार पुरस्कार प्राप्त गर्नुभयो ।
यसैगरी रुपक अलंकार तेस्रो हुनुभयो । उहाँको ‘बङ्गाली बाबा’ कथाले तेस्रो पुरस्कार प्राप्त गरेको हो । बङ्गाली बाबामा साधुसन्यासीको भूत र वर्तमानको रोचक कथावस्तु समेटेको छ । कथाकार अलंकारले नगद १० हजार पुरस्कार प्राप्त गर्नुभयो ।
प्रतियोगितामा कथाकार प्रकाश नेपाली र अनिता पन्थीले सान्त्वना पुरस्कार प्राप्त गर्नुभयो । प्रकाशको ‘मेलम्ची कहिले सुक्छ सरकार ?’ र अनिताको ‘जुगुम्सा’ले सान्त्वना पुरस्कार जितेको हो । दुवै जनाले प्रोत्साहनस्वरुप जनही ५÷५ हजार रुपैंया पुरस्कार प्राप्त गर्नुभयो ।
प्रतियोगितामा पुरस्कृत कथाकारहरुलाई जोशीलाई वरिष्ठ साहित्यकार, प्रसिद्ध लेखक एवम् समालोचक प्रा.डा. गोविन्दराज भट्टराई, जलस्रोत, सीमा एवम् प्रशासन विद, पुर्वसचिव द्धारिकानाथ ढुंगेल, प्रतिष्ठानका अध्यक्ष राममणी ढुंगेललगायतले पुरस्कृत गर्नुभएको थियो ।
सो अवसरमा प्रतियोगितामा सहभागी कथा मध्ये उत्कृष्ट ३० वटा कथालाई समेटेर तयार गरेको कथा संग्रह ‘साहित्य वार्षिक चक्रपाणि’ लोकार्पण गरिएको थियो ।
यस्तै प्रतिष्ठानले चक्रपाणी स्मरण पुरस्कार–२०८१ द्धारा वरिष्ठ साहित्यकार, प्रसिद्ध लेखक एवम् समालोचक प्रा.डा. गोविन्दराज भट्टराईलाई नगद २० हजारसहित सम्मान गरेको थियो ।
सो कार्यक्रममा प्रतिष्ठानले सूर्यविनायक नगरपालिकाभित्र सञ्चालित सार्वजनिक र नीजि स्रोतबाट सञ्चालित विद्यालयमा अध्ययन गरी माध्यामिक शिक्षा परीक्षा (एसईई) २०८० मा नेपाली विषयमा सर्वाधिक अंक ल्याउन एक छात्र र एक छात्रालाई नगद ५ हजारसहित वैजनाथ शुभद्रा प्रोत्साहन पुरस्कार २०८० बाट पुरस्कृत गरिएको थियो ।
वरिष्ठ साहित्यकार बैजनाथ चालिसेले आफु र आफ्ना धर्मपत्नी शुभद्रा चालिसेको नाममा स्थापना गरेको सो पुरस्कार प्राप्त गर्ने छात्र कटुञ्जेस्थित युनिटी इङ्गलिस स्कुलका आशिष थापा हुन भने छात्रामा दधिकोटस्थित मोर्डन स्कुलका समिरा माकजू रहेका छन । कार्यक्रममा १० जना कवि एवम् कवियत्रीहरुले आ–आफ्नो कविता वाचन गरेका थिए ।
