भक्तपुर, कार्तिक १४
भक्तपुर नगरपालिका–१०, मूलढोकास्थित ईष्ट प्वाइण्ट एकेडेमीले मंगलवार आयोजना गरेको जिल्लाव्यापी देउसी भैलो रनिङ्ग शिल्ड प्रतियोगितामा सरस्वती माध्यामिक विद्यालय प्रथम भएको छ ।
प्रतियोगितामा महेन्द्र विद्याश्रम दोस्रो, एड्भान्स एकेडेमी तेस्रो र विनायक शिक्षा निकेतन र जनप्रेमी उच्च माविले सान्त्वना स्थान हासिल गरेका छन ।
प्रतियोगितामा भक्तपुरका ११ वटा विद्यालयको सहभागिता रहेको आयोजक ईष्ट प्वाइण्टका संस्थापक प्रिन्सिपल रमेशचन्द्र श्रेष्ठले जानकारी दिनुभयो । उहाँका अनुसार ईष्ट प्वाइण्टले वि. सं. २०६५ सालदेखी देउसी भैलो प्रतियोगिता आयोजना गर्दै आइरहेको छ ।
मौलिक कला संस्कृतिको जगेर्ना गर्ने र बालबालिकाहरुलाई नेपालको मौलिक संस्कृतिका बारेमा परिचित गराउने उद्देश्यले प्रतियोगिता आयोजना गर्दै आइरहेको उहाँले बताउनुभयो ।
यसअघि प्रतियोगिताको उद्घाटन गर्दै भक्तपुर नगरपालिकाका उपप्रमुख रजनी जोशीले नगरपालिकाले निरन्तर रुपमा सम्पदा संरक्षण सँगसँगै कला र सँस्कृतिको संरक्षण गरिरहेको बताउनुभयो । उहाँले नगरपालिकाले स्थानीय पाठ्यक्रम लागू गरी विद्यार्थीहरुलाई कला संस्कृति र सम्पदा सम्बन्धी ज्ञान दिन खोजिरहेको बताउनुभयो ।
कार्यक्रममा बाजुरा जिल्लाका न्यायाधीस लालकाजी श्रेष्ठले नेपाल विभिन्न जात जाती र धर्म संस्कृति मान्ने थलो भएको हुँदा धार्मिक सहिष्णुता र एक आपसमा सद्भाव रहीआएको चर्चा गर्नुभयो ।
