भक्तपुर, कार्तिक ८
त्रिभुवन आर्मी फुटबल क्लब र ठमेल टेरिजम डेभलपमेन्ट काउन्सिल दोस्रो भेट्रान्स फुटबल प्रतियोगिताको क्वार्टरफाइनलमा प्रवेश गरेको छ । फुटबलर्स मिसन टुगेदरको आयोजनामा सानोथिमिस्थित मध्यपुर युथ एशोसियसनको मैदानमा जारी प्रतियोगिताको समूह चरणको अन्तिम दिन बुधवार जित निकाल्दै आर्मी र ठमेल टुरिजम अन्तिम ८ मा पुगेको हो ।
आर्मीले सानोगौचरण नाइटकिङ (एसएनकेसी) लाई पेनाल्टी सुटआउटमा ३–१ ले पराजित गरी क्वाटरफाइनल प्रवेश गरेको हो । निर्धारित समय १–१ को बराबरीमा टुंगिएपछि खेल टाइब्रेकरमा पुगेको थियो ।
निर्धारित समयसम्म आर्मीका हरि महतो र सानोगौचरणका जगतमान लामाले गोल गरे । आर्मीका महेन्द्र खवास प्लेयर अफ दी म्याच घोषित भए र उनलाई राष्ट्रिय टोलीका सदस्य भरत खवासले पुरस्कृत गरे ।
ठमेल चितवन भेट्रान्स एफसीलाई ४–० ले पराजित गरी क्वाटरफाइनल प्रवेश गरेको हो । ठमेलका टासी छिरिङ, विशाल राई, रमेश गुरुङ र भेषराज राईले गोल गरे । ठमेलका टासी छिरिङ प्लेयर अफ दी म्याच चुनिए र उनलाई आठौं साफका स्वर्ण पदक विजेता कराते खेलाडी रवि महर्जनले पुरस्कृत गरे ।
प्रतियोगितामा बिहीवार क्वार्टरफाइनल खेल हुनेछन् । पहिलो क्वाटरफाईनल हाम्रो धरान भेट्रान्स फुटबल क्लब र सरस्वतीनगर भेट्रान्स, दोश्रो बानेश्वर फ्रेण्डससिप र फ्रिडम फाईटर, तेश्रो आर्मी र किङकम स्पोर्टस क्लब तथा चौथो ठमेल र एनआरटीबीच हुनेछ आयोजकले जनाएको छ ।
